任達華禁囡囡拍戲：會心理唔平衡

在娛樂圈打滾多年的任達華，看盡眾生相，出名是圈中廿四孝爸爸的他，坦言不想寶貝女Ella入行拍戲，免得出現情緒問題。有關華哥與家人及個人的話題，將一連五日在此與讀者分享。

我同琦琦都係Model出身，至於想唔想個女繼承衣鉢，等佢自己鍾意啦！我唔會反對，但就千祈唔好拍戲，唔鼓勵，因為我哋拍戲已經晚晚捱通宵，女仔捱通宵會殘得好快，肌膚都冇咁靚，同埋嗰個心理狀況會唔平衡，晚晚通宵，唔夠瞓會好容易變咗另一種情緒。但我就唔會，會用日常生活例子令到自己諗嘢好正面，加上EQ好高，觀察力強又樂觀，凡事向好嗰方面諗，呢種性格造就我冇呢個問題，但唔代表個女會冇。見過其他演員情緒有問題o架，好似有啲人對個女仔太熱情，但掉轉頭就講到係對方嘅問題，其實人人都會犯錯，好好道歉咪得囉！秦始皇都做咗好多錯事，但佢統一貨幣就對人有利，所以凡事要睇整體。

每個行業都有職業病，拍通宵戲係我嘅職業病，到今時今日個肝都好傷，以前晚晚捱夜，所以依家食嘢好清，同埋做好多運動。夜晚工作辛苦，好似拍親杜琪峯嘅戲，都係夜晚戲，香港呢個拍戲環境，搞到我哋一定要拍夜戲，政府唔幫，下晝根本拍唔到槍戰，結果又係夜晚拍。

做模特兒都可以

其實如果冇必要，我都唔想個女入娛樂圈，好似媽咪咁做Model就OK，起碼唔使通頂，行吓騷就得。

我好明白通宵嘅辛苦，最想個女健健康康、開開朗朗做一個小女孩，成日笑，咁就OK！個女好鍾意笑o架！如果佢有一日話好想入行，我會分析畀佢聽，到大個咗佢要揀，我都冇辦法，每個人最好就係等佢大個自己揀。佢依家話想做老師教書，因為小朋友都好崇拜老師，哈哈，有童真就由得佢，唔好喺呢個時候幫佢Set定要佢做啲乜。

選美黑幕焗妥協

娛樂圈係複雜o架！應該話全世界都複雜，只不過娛樂圈太過浮晒上面，畀大家見到。初初入行都有諗，點解呢個世界咁黑暗？好似有次做選美評判，邊屆我唔講喇，係一個外國選美，佢哋係都要我選美國佳麗，我話美國嗰個唔得喎，佢就話：「如果唔選佢，主辦單位就搵唔到舊錢，Please！」唉，最後我都妥協，但個心好唔舒服，最後美國佳麗得到第三名，可能隔籬兩個評判都要咁做呢，呢啲嘢，唉，算啦！事後我換個角度諗，唔緊要啦，呢個係遊戲規則，遊戲就係咁，身處商業社會，唔怪得人嘅！

任達華Simon Yam

身高：1米80

演藝成就：55年出生，70年代做模特兒，後簽約TVB，85年憑《新紮師兄續集》飾演奸角韓彬聲名大噪，87年投身影圈，至今拍攝逾180部電影，代表作包括《香港舞男》、《羔羊醫生》、《PTU》、《歲月神偷》等，兩奪金紫荊最佳男主角，去年首奪香港電影金像獎影帝。