Twins百萬身價 唱贏雙視帝

平安夜是藝人吸金的大好日子，分別在香港及內地當選視帝的鄭嘉穎與謝天華亦趁勢出擊，袋走25萬元及18萬元，但兩位視帝的酬勞相加仍不及大型活動寵兒Twins！Twins獲斟以百萬酬勞出席內地活動，但二人卻犧牲掘金機會，義唱行善，趁佳節送暖！

每年的平安夜及聖誕節都是藝人吸金的好機會，不少活動主辦商樂於大灑金錢，以明星效應吸引人流。出爐視帝鄭嘉穎最近憑劇集《步步驚心》在內地爆紅，主辦商認為他對內地粉絲極具吸引力，故出高價招手，據知他在前晚舉行的個半小時活動中速賺25萬元，而內地「優酷視帝」謝天華亦袋走18萬元！

玩遊戲任餵

嘉穎前晚在屯門市廣場的倒數活動中打頭陣，除獻唱一曲《怪你過份美麗》外，又讓Fans餵食波板糖，輕鬆袋走25萬元，他坦言對酬勞很滿意：「我本身係歌手出身，平時最多唱歌時間係沖涼自娛。」問到何時再做歌手，他說：「我Sense到明年就會。（簽邊間？）未知，希望劇與劇之間有個Break做歌手。（點解唔唱自己歌？）啲人都唔記得，冇人有共鳴，唱啲大家都識嘅歌。」此外，對於緋聞女友佘詩曼被指怒睥其舊愛周麗淇，嘉穎說：「寫嗰個嚟無綫做編劇啦！唯一真嘅係我同阿佘喺Toby（梁靖琪）婚宴傾過偈，相信阿佘EQ高，唔會咁做。（聖誕SMS？）全部朋友都有Send，唔只佢兩個。」

親戚做紅娘

至於在荃灣出席活動的天華，則獻唱兩首歌及與歌迷玩遊戲，他透露經常以歌手身份到內地登台，故唱歌不成問題。問到出席倒數活動是否犧牲掘金機會，他說：「我一早應承咗呢度，而且想喺香港過聖誕。」對於被指整容，他笑說：「咁犀利？出道20年都傳？」他認為「變臉」與消瘦有關，並笑言怕整容後觀眾不認得他，他又透露已送相機給太太作聖誕禮物。

兩位視帝雖然氣勢如虹，但酬勞卻不敵大型活動寵兒Twins！據知，Twins本獲邀以百萬酬勞參與內地演出，但為行善不惜推掉大好機會，前晚二人演出的尖沙咀海港城倒數活動，據知部分位置需要購票，門票收益全數撥捐「香港血癌基金」，而Twins則不收歌酬，趁佳節送暖！單身過節的鍾欣桐（阿嬌）透露，不少長輩充當紅娘，為她介紹男友。問蔡卓妍（阿Sa）有否介紹男生給好姊妹，她說：「佢要搵容乜易？但要隨緣，我冇擔心過佢呢方面嘅問題，但我識嗰啲單身男仔都『有啲事』。（企唔『直』？）係呀！所以唔得！」此外，她為歌曲《年年》打入叱咤我最喜愛歌曲5強而雀躍，又表示未送禮物給男友陳偉霆。