偉仔自爆拍到嘔轉移視線

梁朝偉昨日出席新片宣傳活動,面對另一主演電影《一代宗師》被笑問成了《一代「失蹤」》,偉仔即醒目地自爆拍戲辛苦到嘔轉移視線!

梁朝偉、周迅、范曉萱、導演麥兆輝及莊文強等昨日雲集上海出席美亞投資新片《聽風者》記者會。向來搞鬼的麥兆輝與莊文強,於記者會甫開始即拿偉仔另一電影作品開玩笑:「一直想搵梁朝偉拍呢部戲,但知道佢拍《一代宗師》好忙,唔敢搵。」

此時有傳媒質疑《聽》片進度慢,矛頭再指《一》片,除有人插嘴指偉仔「再慢的戲也拍過」,又玩普通話諧音將戲名改為《一代「師宗」(失蹤)》。偉仔即扯開話題,在大會展示新戲海報期間自爆搞笑話題轉移視線:「拍呢個場景我唔舒服,嘔咗四次,連水都飲唔落,但呢兩個冇人性嘅導演都繼續要拍。」

擁有「迷人電眼」美譽的偉仔坦言,得悉要在《聽》片再演盲人直言「有啲唔慣」:「呢啲角色睇到又要扮睇唔到,平時我會用眼神做戲,冇咗眼神有啲唔慣,要周圍問人似唔似,有時仲會忘記咗自己係盲。」

唔習慣演盲人

周迅亦笑言經常忘記偉仔是「盲人」,有場戲更拖着他狂跑,偉仔說:「明明見到就撞埋棵樹,都唔知避唔避好。」另外,《聽》片前晚筵開二十多席慶祝關機,導演與偉仔在台上興奮祝酒。

影視組

周迅笑言經常忘記偉仔是「盲人」,更拖着他狂跑。

范曉萱(左起)、梁朝偉和周迅,在台上大談拍攝感受。

王學兵(左起)、范曉萱、梁朝偉、周迅、麥兆輝和莊文強,昨日在上海出席新片記者會。