袁詠儀攜子超巿買餸 張智霖古董辣跑出巡

袁詠儀（靚靚）一直恨追女，可惜仍未如其所願，日前她與老公張智霖分道揚鑣，靚靚與兒子到超巿濕平，而老公張智霖則駕駛其甚少曝光的經典車王、第一代日版MR2辣跑與朋友晚膳。

袁詠儀（靚靚）與張智霖雖已育有一子張慕童（魔童），多年來她仍希望追多名女兒湊個好字，但靚靚卻因甲狀腺問題而把造人計劃押後。

早前靚靚一家豪搬大屋，又於寧波車的法會上誠心求女，還突然推掉與謝天華合作的新劇《女警愛作戰》，即傳出靚靚有喜之說。向來對囝囝呵護備至的她，日前與魔童外出時更全程極為避忌，未有抱起囝囝。

否認老婆有喜

當日下午，靚靚母子與女友人在銅鑼灣超市購物，初時靚靚拖着兒子於店內揀選各類海鮮及蔬菜，精靈的魔童突然跳跳紮跑往凍肉貨架，靚靚見狀未有急跑跟隨，反而女友人醒目地跑往代為照顧魔童，購下大袋餸菜便往乘車，不過靚靚避忌地要友人先抱魔童上車坐定定後，她才尾隨上車。

而老公張智霖日前在寓所附近跑步，被追問靚靚有喜即笑說：「佢大肚？唔係，佢有咗我冇理由唔知，佢之前因為病肥咗啫！依家瘦番好多又靚番啦！」

張智霖透露二人努力造人中，順其自然，其後他於晚上又出動，相約同是愛車的朋友往灣仔晚膳，當晚他更駕駛甚少曝光、1989年出廠的第一代日版MR2辣跑出巡，此經典車王購下僅數個月，價值約十萬元，還配以「MR」字頭車牌，極為搶眼，難怪連泊車人員見到他的愛車，亦眼甘甘望多兩眼。