杏兒封后頭炮袋540萬人仔

胡杏兒封后後成為內地紅人，身價拍得住視帝鄭嘉穎，有指她以18萬「人仔」一集接拍30集內地劇《金玉滿堂》，穩袋540萬「人仔」，但同時有傳另一劇的老闆因爭輸杏兒而呷醋，將她飛起！

胡杏兒當選視后後，不少內地劇希望爭得她成為「女一」，據可靠消息指，有內地劇的老闆對她寵愛有加，以10萬「人仔」邀演，惟中途殺出「程咬金」，最終由內地拉風娛樂開拍的《金玉滿堂》成功以18萬「人仔」一集爭贏，並安排在目前最具影響力的湖南衞視播出！杏兒除穩袋540萬「人仔」外，還有望與憑同台播出劇集《步步驚心》而紅遍內地的鄭嘉穎一樣，成為內地吸金視后！

不過，兩劇相爭卻苦了杏兒，無綫為免她得罪老闆，曾想出妙計希望安排她拍完《金》劇並於明年5月返無綫拍《衝上雲霄2》後，再到內地拍另一劇，那就兩全其美！可惜事與願違，有指另一劇的老闆因未能嘗杏兒的視后頭啖湯，加上杏兒與男友黃宗澤的「互頂宣言」令他呷醋，最終決定一拍兩散，飛起杏兒！

傳有老闆呷醋

記者昨日致電杏兒了解，她說：「我未見過傳聞所指嘅老闆，冇咁嘅事，拍咩劇交畀公司安排，但嗰部劇嘅劇本好好，如果我有期都想拍！（5月拍《衝2》，仲有時間？）公司會幫我就，我辛苦啲都冇所謂！」

至於視帝嘉穎昨日才為無綫劇《怒火街頭II》煞科，今日便要飛往內地開劇，據知未來半年，他將主攻內地市場，拍攝《英雄》等重頭劇，而該劇將同樣於湖南衞視上映。由於內地劇《步步驚心》帶挈他打入內地市場，加上憑無綫劇《怒火街頭》連奪馬來西亞、香港及新加坡3地視帝殊榮，嘉穎立時聲價十倍，有傳他稱帝後片酬已暴增至20多萬「人仔」！