蔡恩真揀男友有米靚仔免問

韓籍女歌手蔡恩真來港發展後，仍未找到對象，她自言擇偶條件簡單，不需要有錢人與靚仔，最重要是比她高及能夠請她食晚飯！。

聖誕將至，韓籍女歌手蔡恩真（E.J）自爆來港前曾遇上一個「難忘」聖誕：「我嗰時鍾意咗個男仔，打算聖誕時灌醉佢然後表白，但點知佢飲完嘔晒出嚟，搭車返家企嗰陣仲瞓到死咗咁，搞到我即刻唔鍾意佢。（咁嗰晚最後同佢做咗咩？）淨係錫嘴，冇做其他嘢。」

問到今年聖誕打算如何結識新對象？E.J說：「未必係識男仔，我想去菲律賓，着紅色比堅尼享受陽光與海灘。（嗰邊多型男？）可能啦！哈哈！」

最緊要夠高大

問到擇偶條件，E.J直言不需要太靚仔：「因為咁樣好冇安全感，有好多靚仔都係花花公子，有好多女朋友，又成日去Party同去飲酒，我唔鍾意咁嘅人！但香港有好多，所以好難搵男友。（醜樣接唔接受？）當然唔好太醜啦！其實高過我已經好好！（富二代會唔會接受？）我的確有好多機會識有錢人，中、韓都有，但其實冇咁嘅需要，因為我可以賺錢，要嘅已經有！」還笑言男友夠錢請食飯已足夠。

工作方面，E.J與日模松岡李那等成立日韓五人女子組合「Girls Kingdom」，準備明年進軍樂壇，希望年初可以出碟，現在已有一首聖誕歌派台。