Tom家庭主夫爆老婆邋遢

樂隊Mr.的成員Tom和MJ難得放低鼓棍和結他，接受《娛樂on Show》訪問，Tom大談將為人父的心情，還踢爆老婆何思諺原來好邋遢！

今年Mr.鼓手Tom與o靚模何思諺（Leanne）奉子成婚，Tom由一個大男孩火速變成住家男人，《娛樂on Show》主持俞詠文（Angela）相約Mr.做訪問，與Tom大談將為人父的心情，Tom說：「心態冇乜改變，做新人時我已經好穩陣，結婚之後就更加穩陣，冇乜壓力！」他對於怎樣教導小朋友更已有腹稿：「我想照顧好佢哋，令我諗起阿媽，因為佢畀咗一個快樂童年我！」

MJ寡言輸蝕

問到會否要Leanne照顧？Tom說：「我倒番轉頭照顧佢就真！我一早搬出嚟自己住，識照顧自己，反而Leanne好邋遢囉！不過佢個人好好！」他又表示不會給予小朋友壓力：「我冇諗要佢讀名校囉！平庸都可以幸福，最緊要係佢對人好！」

此外，結他手MJ自爆不擅辭令，所以不懂得追女仔：「有邊個女仔唔鍾意男仔講嘢？但我唔鍾意講電話，覺得好攰！」