鄭嘉穎:幾個月冇啖好食

為了拍劇,鄭嘉穎三個月來都冇啖好食,為的是要練到腹懷「朱古力」,鋼條過筋肉人。為了做好件事,他總是不到黃河心不死:「做演員就要扮乜似乜,唔係搵鬼睇你做戲!」

我有半年冇做運動,其實我真係好鍾意做運動,之前喺內地拍戲都有Keep住跑步,健康一定唔可以Short-cut,你想健康就一定要做運動。就算喺內地,我最少都跑45分鐘,視乎天氣有幾熱。

如果喺香港就梗係打波,最鍾意打網球,係一種減壓嘅方式。最近亦愛上打泰拳,因為之前拍《拳王》,令我學習到泰拳嘅皮毛,發覺真係幾好玩。講起拍呢套劇,做拳手當然要Fit,要Fit就要節食,我想講做一個演員,最基本係要演乜似乜,但要演乜似乜,中間要付出幾多?觀眾係唔會知,因為我要做拳手,觀眾第一晚就覺得你肥,完全唔收身,咁注定你已失敗,唔好講你演技好唔好啦,你都唔似,觀眾仲睇咩你演技啫?所以點解演員要增肥同減肥,就係呢個道理。

忍「痛」操肌

我拍呢套劇付出當然多,好似胡杏兒當年拍《肥田囍事》,要暴食兼飽到嘔都照吞,你估呢種感覺好好受?我好明白,好彩我唔使增肥,因為減肥實在太辛苦,我唔係咁肥都要練到有六舊腹肌,經歷咗一個痛苦階段,過程係要幾個月冇啖好食,食好乾嘅蒸雞,又唔可以食鹹,仲要走油、走甜,戒甜後成個人都好唔開心,嗰三個月當你瞓又唔夠瞓,食又冇得食,個人就會好Down,我就係咁過咗一段痛苦嘅日子,但最終都得到我要嘅嘢,就係六舊腹肌。可惜依家冇做運動,所以冇咗腹肌,幸好打好個底,冇肚腩囉!  (全文完)

後記:

嘉穎有一顆非一般的爭勝心,他想贏一場遊戲,便一定會先贏自己,令自己不立危牆之下。就以一場網球比賽為例,電視城最大的對手是陳豪,縱然技術略高一籌,嘉穎開波前都會作特別訓練,他說:「點可以輸畀阿Mo(陳豪)呀?」那麼爭視帝亦然嗎?

嘉穎為拍《拳王》而練得一身鋼條身形,真是入型入格!

自言愛做運動的嘉穎,閒時最愛打網球。

鄭嘉穎與胡杏兒今年一同獲得視帝視后殊榮,兩人都曾為角色而不斷增肥或減肥,真的有苦自己知。