Kelly賣口乖解凍

無綫與四大唱片公司已經破冰，據知無綫讓關係友好的歌手率先解封，但強如陳奕迅等歌手因桀驁不馴，隨時秋後算帳繼續冰封！反之，向無綫賣口乖的陳慧琳已能重見天日，昨日陳志雲跟環球高層Duncan商討她的「破冰演出」大計！

繼身為環球歌手的無綫契仔李克勤解凍亮相《歡樂滿東華2011》後，標誌無綫與四大唱片公司（HKRIA）版稅風波正式完結，可惜陳奕迅（Eason）、謝安琪、薛凱琪及張敬軒等過往與無綫關係友好的歌手，於冰封期間得罪無綫，據知無綫可能秋後算帳，話知你天王或天后，一於冇面畀繼續打入冷宮！

孖克勤下月登場

據知，無綫已定好兩份特別名單，關係友好及聽教聽話者當然可以率先解封，相反則注定在無綫冇運行，慢慢排隊等出雪櫃！自克勤獲厚待重返娘家後，向來與無綫關係密切的大肚天后陳慧琳（Kelly）亦已逃出生天，據知她下月將夥拍克勤亮相無綫做大騷，認真皆大歡喜！

志雲飯局斟掂咗

無綫總經理陳志雲一直在四大唱片問題上擔當說客角色，在努力斡旋下，雙方成功破冰，絕對居功至偉！儘管陳總離任在即，仍盡力與環球高層黃劍濤（Duncan）會面，據知二人已協定在克勤解封後，讓Kelly成為破冰後第二位亮相無綫的四大歌手，並獲安排聯同克勤於下月舉行的《2012國際中華小姐競選》擔任表演嘉賓。

昨午1時，志雲與Duncan前後腳現身尖沙咀一間酒店，在一家出名歎漢堡扒的餐廳享用午膳，並選擇坐在暗角位密斟，二人把酒言歡，談到酣處言笑晏晏，似是已為商討事情取得共識！當記者向他們打招呼時，志雲和Duncan相當愕然，問到是否傾大計？Duncan說：「係傾私人嘢，同工作無關！」當記者笑指Duncan請志雲過檔，Duncan笑說：「請唔起，如果請到就好！」問到有甚麼破冰大計？志雲終開腔說：「咪破咗囉！」而Duncan則強調只是私人聚餐，絕非談公事！