鄭嘉穎騰雞(目及)嘢：飛咗本鹹書落山

睇鹹書彷彿是少男的必經之路，男校長大的鄭嘉穎亦然，難道靚仔就要事事規行矩步嗎？甚麼搗蛋、溝女、少男懷春之事，嘉穎都毫不避忌，悉數盡吐！

讀書時真係有太多回憶，我讀香港華仁，係男校，追女仔的確有啲難度，所以如果有同女校嘅聯校活動都好想出席。可惜要去到中三先有資格參加，一直都好想快啲到中三，哈哈！同啲女校學生出席Concert同Party真係好開心，覺得學校都幾顧及我哋身心成長，畀我哋接觸女仔，又唔畀我哋接觸晒！我哋都係靠呢啲機會識女仔，真係彌足珍貴。

聽學長克勤唱歌

就算讀男校都唔係好悶啫，因為有得打波，嗰陣啱啱開始發育都唔知拍拖為何物，見到女仔都好開心啦，感覺又驚又怕醜，唔知點溝通。但去到Party成排女仔，花多眼亂，都唔知點追。記得嗰時李克勤係我學長，陳慧嫻就喺瑪利曼中學讀書，佢哋成日喺聯校演唱會唱歌，我就去睇，大個就輪到我去唱，估唔到日後都同佢哋做咗同事。

讀男校當然有搗蛋事，當年有位同學帶咗本鹹書返學校，我哋嘅Seating Plan係坐到一排排，我就坐喺窗口位，本書一個傳一個，嗰邊睇完就傳畀另一個睇，到傳到我嗰邊，個阿Sir就開始巡，我驚得滯一飛就飛咗本書出窗。唉，本鹹書係我同學阿爸o架，搞到要落山執番本書畀佢。

（明日待續）

口述：鄭嘉穎

筆錄：專案組