嘉穎：等再爆機會

北上拍劇已是藝人搵快錢的主要方法，當鄭嘉穎未做三料視帝前，有傳拍一集已盛惠十六萬人仔，可是他卻嫌錢腥：「唔希望以一個賺快錢形式去密密食，係長遠嘅！」

電視劇《步步驚心》真係好幫到我打入內地市場，其實我有十年冇返過內地，我十一年前由一個歌手轉為一個演員，係因為李國立導演撈我返嚟，嗰時我等好耐都出唔到唱片，去到一個樽頸位，一係繼續等，一係就豁出去拍戲搵錢，我要食飯嘛！就唔理，選擇去搵錢，就接咗《絕代雙驕》做反派嘅江玉郎。

呢部係我第一部電視劇，李國立做Production，林志穎同蘇有朋就演小魚兒同花無缺。之前我擔心一做反派，張唱片就唔使旨意出，原來我擔心係啱嘅，最後真係冇出到唱片。我覺得所有嘢係整定，咁就入咗電視圈。

內地市場龐大

直到上年我拍完《居家兵團》同《怒火街頭》，十月就返內地接咗一套電影叫《秋瑾》，因為清裝要剃頭，我又放張相上微博，李國立就見到我張光頭相，覺得我清裝幾好睇，當時佢揀蟀搵緊人拍《步步驚心》，就選咗我做八阿哥，我有十一年冇返過內地拍劇，大家都知內地嘅市場有幾大，真係好想再試吓，唔想放過呢個機會。

咁遲先返去拍劇唔係我唔想，係冇嘢啱我拍，兩年前一套內地古裝劇搵我又啱啱撞咗期，所以錯過咗，講真，內地真係好少搵我拍劇，真係講你都唔信。

依家《步》劇爆出嚟，威力認真始料不及，以前識我嘅人止於上海以南，依家喺北方都識我，我係可以去到全國，出席活動時係畀我感受到香港從未見過嘅場面，啲人多到人踩人，依家劇本係多到畀我揀唔晒，我係有權揀自己鍾意嘅嘢拍，片酬套套都差唔多，只係想等一個再爆嘅機會，未必會拍好多，只想拍一套最好嘅劇，唔希望以一個賺快錢形式去密密食，係長遠嘅。

（明日待續）