將於Boxing Day舉行音樂會的組合糖兄妹，日前到廣州出席頒獎禮，單身的糖妹笑言要在聖誕前找到另一半，還叫記者介紹「筍盤」：「如果搵唔到男友就大鑊！唔想孤單咁過平安夜。」由於曾是宅男女神，記者指她主動的話必有收穫，糖妹說：「唔會啦！要保持矜持。（心有所屬？）唔係咁容易，唔好問啦！唔使為我擔心，我會努力。」
而與圈外女友感情穩定的糖兄則大方透露，女友當晚亦會現身音樂會打氣，問到有否叫女友大方任影？他說：「有畀心理準備佢，話有記者影就同佢Say Hi。」
糖兄妹在頒獎禮上勇奪「飛躍組合」獎，開心到四萬咁口。
