謝婷婷：唔知做邊樣先

來自星級家庭的謝婷婷，未有因家人的演藝成就而感壓力，只相信逐步來就會有代表作，並渴望與影帝哥哥謝霆鋒合作從中偷師。現時令婷婷最為難的是青春無多，人生計劃卻很多，不知從何入手。

入行後發覺真係學咗唔少老竇媽咪教我嘅嘢，同同齡朋友傾偈會覺得比對方成熟。媽咪話我趁後生，應該去學多啲嘢或去旅行。我真係有好多嘢想做，例如想儲錢買樓，想孭背囊去旅行，同想學普通話，又或者好多人叫我趁後生快啲生仔，但唔知做邊樣先。好似儲錢，我一直都好努力，雖然我好鍾意買衫，但有時會忍手或安慰自己件衫唔係咁靚啫！

初初返嚟香港，完全冇諗過入呢行，有去見工例如PR，唔知係咪屋企名氣嘅關係，抑或當時咁啱係年尾唔請人，我又唔想成日問父母攞錢，所以當時朋友話既然我有時都出席活動，不如試吓真正去做。

以前好多記者影我去蒲，其實係我每次返嚟香港同朋友敍舊，呢幾年真係好少去夜店，有時係為見朋友先出去，傾一個鐘偈已經聲沙，真係好唔慣。我喺加拿大時都唔係成日去蒲，鍾意下廚同打網球，以前打網球仲攞過獎。

依家做Model同演員都喜歡，尤其拍第一部戲，睇番覺得自己好生硬就會想做得更好。拍戲唔係個人表演，仲要配合燈光收音等，片場嘅點滴好值得回味。但就係知自己不足，有時拍完一個鏡頭，導演話收貨，雖然我想拍多個，但同時就會諗自己冇資格，加上一個鏡頭要咁多人配合，唔可以咁自私想補多個Take。

有次同洪金寶合作，佢真係好有大哥風範，就算係講笑都好，人哋都會當認真會驚，當有場對手戲，我要唸一段好長對白，真係好驚，不斷同自己講要做好啲，唔使要佢等，好彩最後兩Take就搞掂。

向哥哥霆鋒偷師

老竇、媽咪同哥哥都有代表作，我都有睇番佢哋嘅作品，真係好深刻難忘。對我嚟講，工作上要逐步逐步嚟，好似拍戲都要學，仲有好大嘅進步空間。我相信就算你幾仔細計劃一件事都好，但出嚟嘅結果未必係你想要，所以我唔會刻意去計劃自己要有代表作。

哥哥咁多拍戲經驗，真係唔怕同佢合作，尤其我尊重一個人先至學到嘢，佢咁值得我尊重，同佢合作真係會好開心。

（全文完）

後記

謝婷婷出道至今，和她合作的無論是老闆、公關或者是片場小工，都盛讚她人前人後禮貌周周。婷婷還會以真誠待人，一個跟她萍水相逢的朋友，家中親人患重病，她都會銘記於心，然後適時致電婉言安慰，又會主動搜羅醫療方法供參考。想說，拉姑，你放心吧！婷婷真的大個女了！

口述：謝婷婷

筆錄：專案組