謝婷婷：佢乜都畀最好嘅我

和謝婷婷愈愛愈甜蜜的影星安志杰（Andy），遇上婷婷即一見傾心主動展開浪漫追求。婷婷欣賞男友超級體貼細心，恍如家庭主婦負責所有家務，不讓她操勞，她又深明男友有驚恐症，即使有小拗撬也會言歸於好。緣分天定，婷婷認定安志杰是終身伴侶。

我同Andy點開始？當年係佢暗戀我先。有晚我喺一間有份投資嘅Bar打桌球，當時係Andy主動埋嚟Say Hi，佢話同哥哥拍過戲，但當時我掛住篤波冇理佢。之後佢每晚都買糖嚟畀我食，佢知我鍾意食紅同綠色嘅糖，所以會抽起其他色先畀我。好多微細嘅事，令我好耐冇試過有個男仔咁細心慢慢去追我嘅感覺，個感覺好Pure（純）。拍拖之後問番佢點解鍾意我，佢話我篤波個樣好靚，我諗番起第一眼見佢，佢真係好靚仔。

Andy之前六年冇拍過拖，佢父母都好擔心，佢一個喺香港，唔使拍戲就匿喺屋企打機，擔心佢唔開心。老竇媽咪喺我拍拖前都見過佢，對佢嘅印象係大隻佬一名！依家大家相處過，覺得Andy好怕醜、斯文同細心。記得有次我去護膚品活動，喺後台驚唔記得台詞，Andy仲笑番我。登台後，見到媽咪老竇好正經咁坐喺台下，老竇戴住黑超，我以為佢瞓着咗，但Andy一出場好怕醜又標晒汗咁，老竇同媽咪同全場人都不停笑。

嘈交氹番Andy

Andy每日都做晒屋企所有嘢，我只係負責衫，因為我驚佢會洗錯晒我啲衫！Andy同老竇一樣好鍾意做家務，例如食完飯佢同老竇一樣唔會畀我掂啲碗，話等佢搞！Andy買嘢返嚟食，知我要啲Sauce拌嚟食，佢會唔出聲落街買畀我，佢乜都畀最好嘅我。我哋好少嘈交，就算係都係因為好濕碎嘅嘢。有時我工作唔開心，對佢語氣倔啲，佢會唔出聲，我諗點解佢唔氹我，但佢會覺得唔係佢激嬲我，所以大家冷靜之後，我會氹番佢先。

希臘搞婚禮

我份人咩都唔驚，但佢性格比較緊張，好似我起身會覺得係新嘅一日，但佢會唔講嘢，好似變咗另一個人。可能因為佢有啲Panic Attack（驚恐症），佢好多年前拍戲，有場戲畀人綁住手腳，再笠住個袋成個人掉落海，拍攝期間發生咗小小問題，對佢有影響，例如坐飛機要食鎮靜劑，潛水只可以潛深少少，所以呢方面我會遷就佢，因為佢都好就我做晒啲家務！我好希望Andy可以同我過下半世，大家都認定對方，我只想結婚時，同兩家人去希臘呢類浪漫嘅地方舉行婚禮，食吓嘢傾吓偈。籌備結婚好麻煩，想簡單啲。Andy成日都話2013年結婚，其實大家冇傾過幾時結婚，可能到時佢要拍戲呢！（明日待續）

口述：婷婷　

筆錄：專案組　

攝：黃叔榮