樂易玲爆料：想Ron關注佢

曾志偉及無綫高層樂易玲昨日出席邵氏電影《2012我愛HK喜上加囍》記者會，樂易玲強調吳卓羲的微博戶口沒遭盜用，亦暗示張馨予上載照片時吳卓羲不在場：「真相好簡單，我同佢參加梁靖琪婚禮，仲玩埋After Party先走，飲到好夜！」她承認吳卓羲曾將密碼告訴張馨予：「但佢助手同經理人都有，方便幫佢更新。Ron話張小姐咁做可能係想佢（Ron）關注佢（張馨予）多啲！」樂易玲笑言感謝女方間接為新片宣傳。

至於曾志偉則指有份參演的張馨予因簽證問題未能來港，要明日才到港繼續拍攝。志偉又強調劇組有安排酒店給張馨予入住：「不過佢返唔返去瞓就唔知喇！（有冇要求住近吳卓羲屋企？）冇喎！但我一定會搵吳卓羲客串囉！」

樂易玲(右)戲言多謝馨予幫忙宣傳新片，志偉則指要搵吳卓羲客串。