天華借醉暗寸嘉穎死仔

出爐視帝鄭嘉穎與落敗的謝天華前晚出席婚宴，可謂狹路相逢！兩人雖然大方合照，但兩杯落肚的天華不禁指着嘉穎說：「死仔，攞晒啲獎，唔留畀我！」以講笑方式講出真心話！

無綫《萬千星輝頒獎禮》賽果已塵埃落定，「Law霸」鄭嘉穎榮膺三料視帝，「Laughing」謝天華則慘變白果王！二人前晚均有出席梁靖琪（Toby）的婚宴，可謂冤家路窄，期間更被安排上台玩摸Pat認老公遊戲，率先上台的天華向嘉穎下戰書，並搞笑扮劉以達：「鄭嘉銳（鄭嘉穎）上台啦！」三哥苗僑偉即說：「爭視帝嘅人自己搞掂佢！」兩杯落肚的天華，未知是否有點醉意，即指着嘉穎說：「死仔，攞晒啲獎，唔留畀我！」他又強調有Laughing打不死精神，希望日後有獎攞，最後兩人企定定合照，贏家嘉穎當然笑晒，輸家天華亦面帶笑容，齊齊上演一場好兄弟戲碼！

死撐好友 期待合作

對於有報道指他以千萬元薪酬接拍內地劇集，與「手下敗將」天華合作，嘉穎其後接受訪問時說：「邊有咁多錢！不能盡信！」更表示與天華合作冇尷尬：「點會尷尬？大家係好朋友，尋晚（前晚）先喺Toby個婚禮合照同玩！」並指他們從未在無綫劇集中合作，故相當期待。

前晚無綫高層梁家樹嫁女場面盛大，搞笑及感動位不絕，令Toby不停落淚，新郎黃敏豪狂讚Toby是80後難得的百分百中國傳統女性，更大叫「我執到」，當他感謝Toby已過身的爺爺時，Toby又再喊！其後新郎唱歌氹番Toby，陳百祥大讚其歌藝比張學友及譚詠麟更佳。而身穿踢死兔的新任外父梁家樹致辭時已High爆半醉，並大搞爛Gag：「兩個女嫁晒，吉咗兩間房，得番兩隻戇狗，其中一隻仲係閹咗嘅西施！」

Toby出嫁 又喊又笑

婚宴上尚有其他搞笑位，姊妹湯盈盈被要求摸Pat搵男友錢嘉樂，更笑言嘉樂的屁股似女人，其後又要新郎憑女士玉腿找出Toby，司儀阮兆祥即搞笑伸腳被摸。另外，一對新人送上印有兩人名字的頸巾及朱古力作回禮。婚宴後，眾人轉場到中環Fly Club開P，凌晨2時賓客始離開，一對新人則玩至半夜3時多才返歸洞房。