Kelly佗慈姑椗叫「小龍包」

陳慧琳昨日出席活動時透露肚中「龍B」是囝囝，因於龍年出世，故暫定花名為「小龍包」！

天后陳慧琳（Kelly）昨日出席代言人簽約儀式，她以露肩裙及平底鞋上陣，可見其腹部隆起，上落樓梯時亦非常小心。她表示懷孕至今已重了約9磅，而龍B亦不時踢她，問到大仔劉昇（蝦餃仔）有否跟BB傾偈？她說：「蝦餃仔仲未知，我冇講，平時着屋企衫唔覺。（幾時講佢知？）等個肚大啲，佢問先講，依家早得滯。」她又指蝦餃仔不算熱情，故不會撲向她。

拒談預產期

Kelly愛為兒子改花名，問到有否為「龍B」改花名？她說：「『小龍包』啦！因為唔想佢叫燒賣，同埋佢龍年出世，叫『小龍包』算！（中文名？）一個都諗唔到，要兩個字好難改。」懷孕近五個月的她又直言會繼續工作，雖然不會停工，但只會出席簡單活動，問到會否專心安胎？她說：「唔使嘅，做嘢都安到胎，同埋我有做瑜伽，郁吓好啲！（幾時預產期？）明年，唔講幾月喇！你哋計到嘅！（追個女？）搞掂呢個先，要健健康康，穩穩陣陣。」

現場播放Kelly與小朋友合作的廣告及花絮，問到品牌有否找她母子檔上陣？她說：「冇，蝦餃仔冇佢哋咁醒，同埋佢太細！」至於填詞人黃偉文將於明年二月開騷，問到Kelly會否繼續擔任嘉賓？她說：「依家呢個情況可以應付到，到時個肚大啲先再決定。」提到不少圈中人都相繼懷有龍B，Kelly笑言要爭床位，之後又要爭學校。