婷婷心痛霆鋒冇童年：有少少同情佢
謝婷婷與哥哥謝霆鋒血濃於水，但原來過去十多年因相隔異地而甚少溝通，所以她不知道哥哥有多紅，霆鋒在她眼中亦只是一個平平無奇的哥哥。現在兩兄妹話多了，亦很珍惜辛苦爭取得來的相處時間，因此婷婷不諱言自私，不想哥哥找女友，擔心他冷落自己之外，最心痛是哥哥太早入行，失去童年應有的快樂。婷婷將一連五日暢談家事、戀事及心事，打開心扉與你分享。
我好冇記性，好多細個嘅嘢都唔係好記得，同哥哥嘅相處只限於好細個同埋喺加拿大讀書嗰陣。記得哥哥好百厭，有次沿住學校條旋轉樓梯嘅扶手由三樓滑落去，點知跌咗落中間個窿度，好似跳樓咁手腳拗晒，諗起都好笑！
後來哥哥十幾歲入行，同媽咪、老竇都喺香港，得我一個喺加拿大，所以哥哥入行後發生任何有幾大嘅新聞，我都唔係好知，家人冇同我講，我又唔會問，一來我唔識睇中文，二來我喺加拿大有自己嘅世界，成個鬼妹仔咁，對香港娛樂圈完全係零認知，同哥哥都係一年見一次，佢又唔會打電話畀我，真係十幾年冇通過電話，所以哥哥有幾紅，我真係唔知！
唔知哥哥有幾紅
一直以嚟，無論哥哥出唱片或開演唱會，都唔會刻意同我講，後來我先知哥哥原來紅到個地位in one sense（某種意義上）就好似美國Alicia Keys咁勁，就會覺得：「嘩！哥哥原來咁犀利、咁紅！」但哥哥又講到好似冇乜嘢、好唔Care咁，我就會心諗：「嘩！使唔使咁扮嘢、咁唔在乎先？」如果我好似佢咁紅，仲唔發癲？哈哈！
平時見哥哥，唔覺得佢咁超人，但我返港後開始慢慢知多咗呢行嘅運作，上網又見到咁多Fans愛錫佢，就知哥哥好紅。最好笑係舊年上網睇到一段十幾分鐘嘅短片，有個內地Fans不斷喊住話：「我好愛霆鋒！」當時真係笑咗出嚟，仲心諗：「嘩！使唔使咁愛呀？你知唔知其實哥哥好污糟！」哈哈哈！有時知哥哥冇沖涼洗頭，但望落去又唔污糟，又唔會有臭味！
收追魂Call甜入心
其實哥哥真係好識諗，老竇、媽咪都好尊重佢嘅決定同意見，佢識諗到一個地步，我真係有少少同情佢，因為佢咁細個就入行，冇咗Childhood（童年），好多事無論起跌，都加快佢成熟，佢廿歲就講五十歲嘅嘢，包含好多內涵智慧。
依家哥哥去邊都好，就算幾唔得閒，都會叫助手打畀我問我做緊乜，咁樣我已經好開心！有時同Andy（男友安志杰）去哥哥屋企，哥哥好鍾意叫我睇佢打機，我就會煮麵畀佢食。其實佢打緊機時，螢幕入面邊個係佢我都唔知，但我都會畀反應氹吓佢話：「嘩！好勁呀阿哥！點解Andy唔係好似你咁！」
從未反對入娛圈
由我入行開始，好多記者都話哥哥反對我入行，但其實佢從來冇親口同我講過，我明白站在哥哥立場，當然想保護妹妹，如果我係佢都會咁諗，但如果佢認識我多少少，就會明白我Handle到。哥哥冇喺我面前讚過我，但有喺媽咪面前讚，我聽到真係好開心，已經唔需要知佢讚我乜。（明日待續）
謝婷婷（Jennifer）
年齡：29歲
入行：在加拿大完成心理學學士課程後，07年底探路入行，迅即成為品牌寵兒，去年正式簽約王晶旗下，作品包括《李小龍傳》及最近的《猛鬼愛情故事》。
服裝：Harvey Nichols
場地：L'Hotel南灣海景酒店
化妝：Kamen Leung
髮型：Ray Chan @ Ray Chan Studio
婷婷讚嘆霆鋒是「超人」，雖然兩兄妹相處時間不多，但感情極要好。
霆鋒從不在婷婷面前炫耀成就，令入行前的她完全不知哥哥究竟有多紅！
婷婷很珍惜與哥哥的相處時間，即使只是為他煮個麵，已經非常開心。