杏兒捱餓扮靚捧硬視后

視帝揭盅，視后今晚亦有結果！賽前呼聲甚高的胡杏兒可說是坐定粒六，不過成功背後原來亦有鮮為人知的辛酸，昨晚忙完拍劇又趕出騷的她，只能以外賣薄餅果腹。對於有望今晚封后，她強調不會胡思亂想，但會扮靚靚預備「加冕」！

視后大熱胡杏兒及陳法拉於賽前鬥到火紅火綠，但轉入直路後，法拉似乎後勁不繼，被杏兒後來居上，有傳備受無綫高層及網民力撐的杏兒，封視后可謂十拿九穩！

不過原來這位「準視后」對人歡笑、背人愁，昨晚七時許，杏兒拍完《怒火街頭II》後，行色匆匆趕往尖沙咀整頭，準備出席《萬凰之王》結局篇活動，只見剛於髮型屋整完頭的她，在助手陪同下趕落樓，到附近一間餐廳買外賣薄餅，買完即去停車場等保母車接載，餓鬼上身的她在等車時亦忘卻其「準視后」身份，不時打開盒蓋聞薄餅味，車抵達時她即跑上車，辛苦一日終於有得開餐！

吳鎮宇四哥頒獎

被捧為「視后」的杏兒透過電話訪問時多謝大家支持：「依家想放鬆啲，唔好太大壓力，呢排都忙住做嘢，冇時間胡思亂想，最感動係世界各地嘅粉絲嚟香港撐我！」對於今晚有望封后，她笑言不會多想，只求盡力扮靚出席頒獎禮，問到若奪獎後會否公開與黃宗澤關係或公布好消息，她尷尬地說：「諗諗先啦！大家睇吓咪知囉！」

另外，吳鎮宇昨日被問到會否擔任頒獎嘉賓時，他最初支吾以對，及後終於承認，問到若他頒視帝即內定謝天華，他否認：「其實我負責頒視后，到時會同四哥（謝賢）一齊頒。」未知無綫今次是否玩Gimmick，因為鎮宇早前曾批評杏兒不懂演戲！另外，陳志雲早前以網名「Eggzero」開微博，杏兒亦是他關注密友之一，令其「封后」走勢更見凌厲。