天華吹「雞」拉票誓奪視帝

視帝、視后花落誰家今晚揭盅！視帝之爭尤為激烈，但相信都離不開謝天華和鄭嘉穎之爭，然而呼聲最高的天華昨日再度Laughing哥上身，潛行屋邨掏出五蚊雞「吹雞」造勢，旋即吸引大批師奶及小朋友Fans前來擁戴！

無綫《萬千星輝頒獎典禮2011》今晚假將軍澳電視城舉行，並決定視帝、視后花落誰家！視后之爭在陳法拉突然放軟手腳下，胡杏兒幾近坐定粒六，在娘家初嘗封后滋味！反觀視帝競爭才是焦點所在，「Laughing哥」謝天華和「Law霸」鄭嘉穎，無論在民意及各項投票中都是叮噹馬頭，最終鹿死誰手仍是未知之數！

今晨敲定賽果

往年無綫神枱級高層都會在頒獎禮前開會投票，他們手中每一票都成為視帝、視后的關鍵所在。不過，為防賽前洩漏投票結果，今年無綫諗出一條絕世好橋，把該圓桌會議推遲至今晨10時半舉行，由7大巨頭陳志雲、樂易玲、曾勵珍、彭濟材、梁家樹、何冠中及陳家揚定生死。而一眾監製已於上周五親自到指定地點投票，有別過往不記名投票規矩，此舉令不少監製摸不着頭腦。至目前為止，據知天華和嘉穎的票數咬得好緊，但暫時仍以天華略略佔先；視后方面，卻是出現杏兒一面倒的情況，若法拉要撥亂反正，果真談何容易！

為壯膽登頂，天華於昨午出席完聖誕活動後，獨自驅車往柴灣小西灣邨造勢，只見他一落車，已引來萬人空巷，不少公公婆婆更高呼：「Laughing哥，我哋全家都支持你！」如此面上貼金，天華連忙說多謝支持！其後當天華肚仔餓去買麵包充飢時，見勢即Laughing哥上身，毫不猶豫掏出Laughing哥最具代表性的五蚊銀，在一聲令下，無論師奶或大人細路頃刻蜂擁而至，爭相合照之餘，又跟Laughing哥吹水，以示支持，有小朋友更上前跟Laughing哥合唱《潛行狙擊》主題曲《獨行》，逗得他樂開懷！

壓力大瞓唔着

至於出席聖誕活動時，天華被問到是否攞硬視帝，他說：「未知！因為呢幾日都有好多唔同嘅講法！」他表示若然吳鎮宇頒獎給他，會十分高興：「佢出現會開心，因為更加星光熠熠，但唔意味會有乜嘢賽果，亦未知係咪安排佢頒男主角獎！」對於嘉穎笑言由鎮宇頒獎即代表他「冇行」，天華說：「咁得意？我諗係佢誤解啫！咁係咪唔想佢出現呀？」他又透露近日控制不到壓力，搞到晚晚輾轉反側。談到無綫幫他谷電影宣傳造勢，他說：「之前一早宣布上映《Laughing Gor之潛罪犯》，唔關事！」他又表示即使輸給嘉穎，也會尊重遊戲規則，強調最緊要是體育精神。

另外，同樣憑《潛行狙擊》角逐視后及「我最喜愛的電視女角色」的徐子珊，昨日出席另一聖誕活動時，卻長他人志氣說：「我睇好杏兒，佢呼聲高，我已經諗定到時同杏兒、黃宗澤講乜。我第一次入圍『最佳女主角』就入到五強，已經好滿足，我都係睇好杏兒同法拉，我寄望明年。」對於天華奪視帝呼聲高，子珊接受電話訪問時力撐對方：「佢都好！佢Laughing哥個角色好突出，如果唔係都唔會延續到去電影版！」