李曼筠險厭食剩女危機

「動漫Maggie」李曼筠擁有34D驕人身材，再加上甜美笑容，令她成為少男的夢中情人，理應不愁冇拖拍。但年紀輕輕的她竟開始擔心步入剩女行列，更坦言曾因為工作壓力大而瀕臨厭食症邊緣。

現年23歲的李曼筠（Maggie）於06年憑34D驕人身材，在香港動漫節擔任模特兒而成功彈出，成為宅男女神，更自此被封「動漫Maggie」稱號。Maggie一向事業心重，既要拍電影，又要兼顧模特兒工作。專注工作的她每日忙到只睡三、四小時，但每當靜下來時便倍感寂寞：「每當晚上失眠時，我都問自己工作咁忙為咩，亦渴望可以談一場真正嘅戀愛！」

遇體貼追求者

皇天不負有心人，Maggie自爆已遇上一名體貼的追求者：「佢好體貼、細心o架！就算我忙到冇時間理佢，佢都永冇『詐型』！」男方更施展電話短訊攻勢，她甜到漏地說：「佢成日Send SMS畀我o架，但我可能要到半夜、甚至第二朝起身先有時間覆，但佢永遠唔會怪我，同佢相處一啲壓力都冇！」

談及兩人的浪漫經歷，Maggie便滔滔不絕：「佢知道我鍾意飲紅酒、白酒同香檳，約會食飯時，佢竟然為我準備白酒，仲特意配上Snack（小食），真係好窩心！兩個人相處根本唔需要刻意營造誇張驚喜。」她坦言最愛成熟和富正義感男士：「佢比我大十幾年。（從事咩行業？）佢係警察，感覺可以保護到我，我最鍾意有正義感嘅人！」但Maggie與對方只交往了幾個月，因認識時間尚短，仍未清楚肯定對方是否「Mr. Right」，故擔心將來要步入剩女行列。

減肥過度作嘔

Maggie一向予人開心少女形象，但她自言性格內斂，即使碰上不快事，都會在家人、朋友面前掩飾，只會在夜半無人時躲在被窩裏哭，加上對自己要求高，故有段時間「屈到病」，更險染上厭食症：「07年我最肥嘅時侯，我用盡方法嘗試減肥，做運動、又做機（美容院療程）、又節食都減唔到，最後發展到只要聞到食物嘅味道都作嘔！我好在意人哋嘅目光，當時嘅公司要我減肥，我減到個樣好憔悴，除咗公司同事認為我好睇外，冇人覺得好睇，所以我都好迷惘！我好鍾意食麵包，但又驚肥，所以去麵包舖聞吓啲香味就走番出嚟，最後好彩身邊朋友逼我食番嘢，我先好番！」

經一事、長一智，Maggie表示已變得成熟：「我已經冇以前咁執着，只要做好自己就足夠！毋須太在意人哋嘅目光。」除了專注工作外，她亦不忘自我增值，現時除了學功夫和跳舞，以增加飾演不同類型角色的機會外，更參與幕後活動統籌的工作：「畢竟我已經23歲，應該用盡所有時間去增值，以免浪費人生！」

冇被舊愛虐打

性格慢熱的Maggie原來十分念舊、重情義，重視身邊所有人，對朋友更可謂赴湯蹈火也在所不惜，去年曾發生疑似被虐打事件，外界不禁猜測她被前男友虐打，但她澄清絕無此事：「只係同朋友有少少『拗撬』，唔係好嚴重嘅事。（佢打你？）冇！只係因為地方淺窄而有啲碰撞。（同對方仲有聯絡？）有，但就冇以前咁Close。百世修來同船渡，千世修來共枕眠！大家相識係緣分，應該珍惜大家嘅友誼，即使有事發生咗，都應該畀機會對方，如果大家面左左就冇意思！（事後佢有道歉？）大家講句（對唔住）就OK，最緊要有誠意！」

後記：學功夫儆惡懲奸

外表嬌柔的Maggie，原來內心很堅強，學功夫也為了「儆惡懲奸」，她說：「我見到女仔喺車廂被非禮嘅新聞會好嬲！佢哋受辱都唔敢出聲，我就好想喺現場保護佢哋，我細個好鍾意睇卡通片《美少女戰士》，我好想學Sailormoon咁儆惡懲奸！」未知Maggie是否受從事紀律部隊的追求者影響而增強了正義感呢？