李亞男情迷日式串燒

「燒雞翼，我鍾意食！」不知何時開始，款式多元、價錢任君選擇的燒物成為港人不可或缺的美食。今次請來李亞男，帶大家走遍平貴串燒店品嘗美食。

李亞男情迷燒物，原來與她喜愛BBQ有關。9歲從上海移民加拿大讀書及生活的亞男，笑言BBQ是首選的家庭樂，皆因能夠享受食物原味之餘，亦可與家人談天說地：「嗰度間屋好大，有後花園，我哋最鍾意成家人或者請大班朋友返嚟一齊燒。」

唔食得辣

亞男說BBQ最大的吸引之處是「夠放肆」：「可以一次過食好多唔同種類嘅肉，雖然係燥啲。」她更視燒烤場為「創意廚房」：「我同妹妹會將啲唔同嘅肉同蔬菜溝埋一齊燒，大家都好接受我哋嘅創意，哈哈。」

回流香港初期，亞男因要出鏡，故經歷了兩年地獄式的節食生涯，及後在營養師提點後，她終明白吃得均衡才是王道，加上好友不斷介紹好的日本餐廳給她，因而令她愛上日式串燒，然後「跨界」再品嘗泰國串燒及重慶串燒等，但可惜兩種串燒都不及日式對胃口：「泰國串燒啲咖喱同沙嗲味太重，搞到我分唔到雞、牛、豬嘅味，唔夠原汁原味，冇癮。至於重慶串燒夠惹味，但因為我唔太食得辣，所以唔會好鍾意。」

貴價之選：日本串燒

１.鹽燒牛舌 $58

「我一直都好鍾意食燒牛脷，雖然試食時啲牛脷已經凍咗，但係師傅叮番熱後依然好多汁好鮮甜，食到我Lam Lam脷。聽師傅講，佢哋喺一大塊牛脷裏面，只會精選一小塊肉去燒，所以食起上嚟先咁多汁，真係好講究。」

２.鹽燒雞掌心 $48

「食落去時好脆好爽口，師傅話我知係雞掌心嘅時候，我覺得好Surprise，估唔到呢個部分都可以做串燒，用嚟送酒一流。」

３.自家製雞肉丸 $48

「雞肉丸加咗雞軟骨之後個口感好特別，滿口肉汁嘅同時又有一粒粒嘅脆口嘢咬吓，真係好得意。」

４.和牛鹽燒 $100（1串）

「燒物最重要係啲材料夠靚夠新鮮，呢個鹽燒和牛絕對做到呢樣嘢，食完成個禮拜都仲記得嗰種好味道。」

電話：25662808

平價之選：重慶串燒

１.香脆土匪雞翼$13（2隻）

「土匪雞翼感覺好香，我見師傅落咗好多香料，佢話啲香料大部分嘅產地都係重慶，味道夠晒正宗。啲雞翼外皮都燒得好脆，師傅話有秘訣，就係燒雞翼嗰陣要不停郁動支竹籤，等啲熱度可以均勻咁走遍成隻雞翼。」

２.老李燒牛肉 $13

「呢種燒牛肉好似當年我喺加拿大嘅創意製成品，雪花肥牛再夾甜椒一齊燒，啲牛味好濃，加埋甜椒一齊燒起咗中和嘅作用，感覺冇咁滯。」

３.燒蒜芯 $8

「我唔知蒜芯係乜，但知道唔係周圍有得食，燒蔬菜唔易，一係燒極唔熟，一係縮水，好難搞，師傅燒完後都咁翠綠，唔使食都知佢厲害。」

４.燒四季豆 8

「呢個四季豆豆味香濃、又有甜味，都幾值得食，不過見師傅落咁多油去谷味，我都唔係咁敢食太多。」

電話：66256070