陳豪冧撐茵媺 奪最佳女配角

無綫頒獎禮如箭在弦，陳豪角逐「我最喜愛的電視男角色」，他坦言信心不大，但「冧爆」睇好女友陳茵媺奪「最佳女配角」；憑《真相》爭「我最喜愛的電視女角色」的楊怡表示，若得獎料會上台爆喊！

在電視圈打滾多年的陳豪與楊怡，近年在每部電視劇均擔大旗，一線小生花旦地位穩如泰山，兩人今年在無綫頒獎禮分別競逐多項大獎，既有份競逐視帝視后「大獎」，陳豪同時憑《點解阿Sir係阿Sir》競逐「我最喜愛的電視男角色」，但他坦言對該獎信心不大。

鍾嘉欣喊出位

問到是否因劇中飾演「衰人」，欺騙「Miss Koo」鍾嘉欣的感情，而擔心不被觀眾受落？他說：「呢樣嘢反而唔理，作為演員，我哋嘅作用係波動觀眾情緒，但我都係對自己冇信心，反而支持鍾嘉欣，佢喺劇中嗰場喊戲咁突出，睇吓佢好唔好彩啦！」

提到其女友陳茵媺今年的演出亦有突出表現，憑《真相》提名「最佳女配角」，陳豪即揚言絕對支持女友，認為她會得獎：「佢幾有天分，除咗本身努力之外，做戲最緊要畀到一份舒服嘅感覺人，而啲觀眾又接受，呢方面佢係做到，佢仲有好大嘅發展空間！（如果女友攞獎，你會有咩獎勵？）等佢拎到先啦！就算冇都唔緊要，最重要係得到觀眾嘅掌聲同支持。」

台上真情流露

至於楊怡憑《真相》角逐「我最喜愛的電視女角色」，對手包括胡杏兒、陳法拉及鍾嘉欣等，她表示雖然鍾嘉欣是其心水，但她仍對自己有信心：「自私啲都要投自己一票，如果贏到對自己都有交代，如果真係攞獎，我喺台上一定會喊，會毫不保留，因為呢個係我嘅真性情。」