雛鳳開鑼吸引謝安琪

龍劍笙及梅雪詩為紀念投身戲行半世紀的作品《龍情詩意半世紀》前晚正式開鑼，兩人的師傅白雪仙由秘道駕臨監督徒弟演出，戲迷發現「仙蹤」時即全場起立鼓掌，以表尊重，而歌手謝安琪亦有撐場。

任白愛徒龍劍笙及梅雪詩前晚再踏台板，於沙田大會堂為正式公演《龍情詩意半世紀》，仙姐在契仔陳培偉醫生及契女高王玉琼陪同下，於開場前匆匆到場，並由秘道進入會場，傳媒爭相拍照，引起一陣小哄動。仙姐亦大方微笑揮手，進場後更獲全場觀眾站立鼓掌。

演出期間，仙姐絕少跟鄰座交談，目不轉睛地欣賞徒弟演出，對於首晚演出，龍劍笙說：「比我預期更加緊張。」

一票難求

除仙姐外，這齣引發全城一票難求的戲寶，亦吸引謝安琪、關寶慧、阮兆輝、無綫外事部副總監曾醒明，以及警務處處長曾偉雄伉儷等捧場，謝安琪說：「好耐之前問主辦單位要飛，終於開鑼前最後一刻覆我有飛，我好鍾意粵劇，睇過陳寶珠演出，感動到喊，我係第一次睇雛鳳，非常期待。」而久未出席公開場合的關寶慧則手貼膠布現身，她說：「我買咗新電話，唔識轉個電話簿落去，人手入咗五百個電話後手痛，去按摩畀人按到好似慘遭性虐待咁，咪搞成咁囉！」