浩民生女風騷笑

女神陳嘉桓（Rose）上月爆出橫店涉遭狼吻事件，哄動全城！「男主角」陳浩民昨日榮升老竇，開心到喊！相反，Rose抑壓情緒宣傳，全程強顏歡笑，更哽咽想喊，加上弟弟爆肺入院，禍不單行！

雖然「狼吻事件」男主角之一的陳浩民是非纏身，甚至可能遭Rose和其師傅冼國林起訴，但無損他榮升父親的喜悅！昨晨十時半，浩民與岳父母等陪太太蔣麗莎（Lisa）到銅鑼灣聖保祿醫院，太太落車後轉坐輪椅被推入院，於下午一時半開刀產女，囡囡重6.6磅，母女平安，取名陳雅薷，由浩民親自剪臍帶。

浩民在醫院會客室舉行記者會和發聲明公布喜訊，初為人父的他表現激動：「因為胎兒臍帶纏頸，醫生建議太太提早生產，佢話早好過遲，而今（昨）日亦係太太嘅生日，屋企有兩位女王同日生日，感覺好特別，所以決定揀今（昨）日開刀生。」至於名字由來，他說：「中文名由長輩起，英文名就打算喺我同太太嘅英文名字頭揀，但仲未落實！心情唔算好緊張，因為已經一早執好嘢，準備就緒。（拍下分娩過程？）產房入面唔畀拍片，當時我見住啲血係咁流，自己都驚到手震，仲喊咗出嚟！（剪臍帶時手起刀落？）咁又冇咁狠！」他還賣口乖說：「太太好勇敢，佢真係好偉大！」浩民表示收到好友麥長青致電恭賀，他揚言會主動致電馬德鐘及洪天明報喜。「狼吻事件」後馬德鐘被指與他劃清界線，問到有否嬲對方？浩民大方地說：「仲咩嬲佢吖？朋友嚟㗎喎！呢幾日忙，冇打畀佢咋！」

取名雅薷教守禮

事後，浩民經理人林查理發聲明透露，BB名字寓意「知書識禮，落落大方，希望她能健健康康、快快樂樂地成長」，還廣發浩民與BB女的全家福，相中Lisa雖然略為憔悴，但幸福之情洋溢臉上，而浩民亦笑到四萬咁口，一家三口樂也融融！

此外，Lisa開刀誕女前在微博談及心情，她寫道：「26年前媽媽辛苦的把我生下，26年後的今天，我將賦予新的生命，完成接力棒的傳遞，BB加油！媽媽爸爸與你同在。」她還笑言老公浩民比她還要緊張。