阿旦離家出走破愛情困局

結婚是每個女孩的夢想，即使踏入娛樂圈這個花花世界，(o靚)模鄧伊玲（阿旦）依然堅持有愛情生活，無懼公開另一半。可惜隨着大家生活忙碌，感情不知不覺變成習慣，結婚這個願望未必能成真！

阿旦與電視節目主持黎國輝（阿感）的6年情人所共知，但近日卻傳出分手！談到現時的關係，阿旦直言已「分居」：「我哋冇分手，仲一齊緊，只係暫時搬出嚟冷靜吓。」雖然她仍喜歡阿感，但若繼續維持現狀，「結婚」這個夢想似乎只能原地踏步。

兩年冇拍拖食飯

其實兩口子沒有鬧交，只是平日的不咬弦一點一滴累積，令阿旦萌生搬家念頭，她更坦言仍喜歡阿感：「當然我仲鍾意佢！我亦想過幾時結婚，但佢似乎冇咩意欲，既然係咁，不如分開吓！」搬走當然有風險，就是隨時被人乘虛而入，但她抱着放手一博的心態：「自從同居後，佢好似覺得我一定喺屋企等佢，有時佢早咗收工，都會搵朋友打波，唔會特登約我出街，我哋差唔多兩年冇出街撐枱腳喇！」

唔想男友當仔湊

阿旦認為同居令雙方缺乏私人空間：「有時朋友約出街都會有顧慮，我一收工就趕返屋企，想等佢一齊食飯，唔想丟低佢喺屋企。」同居就像預演婚姻生活，阿旦驚覺需要改變：「我成日趕返屋企，可能只為煮個麵畀佢食，照顧佢起居生活，但我唔想做佢阿媽，我仍然想有拍拖生活！」她不諱言雙方當初發展太快，缺乏「追」的過程，她希望搬走後，雙方會學懂珍惜：「希望搬咗出嚟，令佢真係抽時間出嚟見我，出去食吓飯。」

這次「離家出走」難免令人覺得阿旦想逼婚，但她強調只想改善關係：「我知道搬出去可能會更快分手，但步伐唔一致，嘗試分開吓可能係好事。」她擔心若不走出這一步，雙方只會繼續待在進退失據的死胡同中。