G.E.M.插Stephy唱Live驚嚇

有小巨肺之稱的歌手G.E.M.（鄧紫棋），其07年網上私人日記疑遭黑客入侵而曝光，網誌中她勁踩「肥杏」樣衰，又彈鄧麗欣唱現場差，更連自己阿媽都鬧埋一份！但「出事」後，她希望大家不要怪她這個細路仔。

歌手G.E.M.一個陳年網上私人日記被公開並在網上流傳，當中包括與初戀男友的合照及甜蜜留言，但最激的莫過於她勁踩「好嘢，死肥杏無獎！！HEHEHE，佢係全世界最樣衰最唔識做戲嘅演員」，疑有影射胡杏兒之嫌！她又彈鄧麗欣唱Live「驚嚇」，又用「核突」來形容吳卓羲跳舞，甚至鬧阿媽煩及常掃她興。

昨日G.E.M.以電話回覆本報：「我諗阿媽睇到都會嬲，當時冇諗過私人日記會畀人睇到，如果有人睇到唔開心都想道歉。」當年還未入行的G.E.M.只有14、5歲，問到日後見到胡杏兒、鄧麗欣會否尷尬？她說：「嗰時咁細個，都唔記得咗自己咁寫，希望佢哋有怪莫怪我唔識世界，當時都係粉絲心態，細個以為寫完又唔使負責任。」

自嘲有報應

她坦言已受到報應，因如今當了歌手，不時被其他粉絲罵，她說：「做咗歌手三年半，見到身邊好多歌手藝人都經過辛苦、努力，畀心機去做，我諗嘢都唔會再好似以前細路仔咁諗。」重看年少的網誌，她不禁自嘲「大白癡」、「低能」：「真係好醜！（會否法律追究？）公司有去信網站了解，個黑客做緊嘅嘢，等同當年細個一樣以為冇人知，係好唔成熟嘅表現。」

而鄧麗欣對於G.E.M.大彈其歌藝差，她透過經理人回覆：「佢都唔記得，冇所謂啦！每個人都有自己喜好。」至於杏兒則至截稿前仍未回覆。