浩民陪產檢洗底 冼國林決報公安

陳浩民為攬啜陳嘉桓（Rose）一事於前日開懺悔記者會，向Rose公開道歉。為重塑好丈夫及好爸爸形象，浩民昨日陪太太產檢及承諾會身教女兒，惟Rose師傅冼國林則堅持到底，據悉決定下周在內地正式報公安！

陳浩民上周在橫店涉無禮狼啜陳嘉桓，令形象大插水，他前日與太太蔣麗莎（Lisa）開記者會向Rose致歉，期間激動嚎哭！經過一晚休息後，浩民於昨午偕臨盆在即的Lisa離開寓所到銅鑼灣產檢。浩民全程扶實Lisa，並坦言心情未平復！問到有否聯絡Rose？他避談：「到啦！到啦！（搵Rose道歉？）有機會當然希望同佢當面道歉！（搵冼師傅？）有！但冇人聽。（目前為止警方有冇搵你？）冇！」沿途有內地旅客認出浩民，並大叫：「支持你！」但有途人錯認他為鄭嘉穎。

老婆唔肯食嘢

抵達後，Lisa在診所內磅重，僅約150磅，護士指她好瘦，浩民說：「我唔喺度，佢唔肯食嘢，依家我喺度，就唔使擔心，今日先餵佢食飯！」其後護士叫Lisa到診所外的洗手間驗尿，浩民本想拿鎖匙開女洗手間門，但他說：「我開唔係幾好。」最後由太太開門。他透露太太懷女嬰，問到是否已改名？他說：「未改，交畀老人家話事，健康就得。（女兒成長路點走？）想佢成為社會棟樑，唔好成為包袱。（生幾多個？）老婆話事。」其後Lisa返回診所檢查，15分鐘後，浩民表示B女情況良好：「BB偏瘦，太太之前肥過頭，依家正常番。」Lisa則說：「BB好頑皮，喜歡聽他聲音，在肚子內走來走去。」

擔心要負刑責

浩民又爆BB臍帶纏頸：「再過多幾日睇吓點，等醫生再決定情況。（擺滿月酒？）應該會擺百日宴，嚟緊12月中離港，之後拍劇拍到明年3月。」

兩人離開診所，浩民透露預產期為周一，問到會否擔心須負上刑事責任？他說：「都驚唔嚟！」問到誰人陪太太坐月？他說：「都有！係我哋家人，老婆家人會嚟香港陪月。」離開時記者發現浩民鼻子又紅又損，他解釋：「唔係感冒，只係尋日抹鼻整損。」跟着便到時代廣場內的超市掃貨：「佢要乜嘢都買畀佢。」然後乘車返家。

事後本報記者致電浩民，問到如何身教？他說：「當然好小心，我會努力賺錢，太太喺屋企湊女，將來所有資源投放喺個女身上。」談及B女臍帶纏頸，他說：「唔正常，但呢啲係好常見，醫生話冇危險，唔會影響日後B女發育，睇埋呢幾日BB轉位狀況，再決定邊日開刀。」

雖然浩民已舉行道歉記者會，但據知Rose師傅冼國林決定下周在內地正式報公安。另外，冼師傅昨午接受now觀星台電話訪問，對於浩民舉行道歉記者會被網民批評很假，冼師傅表示沒有留意，但充滿弦外之音：「我冇睇，亦唔想評論太多，但睇番啲對白，前文後理已經心裏有數。」