簡華捷評子丹有番咁上下

一代宗師葉問得意弟子簡華捷，日前與一眾師弟和徒子徒孫舉行聯歡晚會，宣揚正宗詠春。對於甄子丹近年以《葉問》系列打響名堂，令愈來愈多人對詠春產生興趣，席間簡師傅認為子丹打詠春有板有眼！

甄子丹主演的《葉問》系列在兩岸三地都引來極大回響，吸引老中青都紛紛走去學詠春，掀起一陣「詠春熱」！不過，葉問生前得意弟子簡華捷表示詠春是一門易學難精的武術，如今因為有太多人乘機賺快錢，所以招式已不夠精純，甚至走歪了路，他說：「改裝詠春易學又好睇，啲人又唔識，梗係多人學！其實學詠春唔可以一暴十寒，我玩小念頭，都學咗六個月啦！」談到甄子丹能否演活葉問神髓？他直言：「唔可以話佢打得純正囉！都係拍戲啫！外人睇咪咁上下囉！唔關演員事，可能係導演問題。」

由於坊間的改裝詠春並不是玄門正宗，很多學武之士不知就裏，很容易會學壞手勢。有見及此，簡師傅聯同師弟王正宇、黃朗、徒弟Mark及師姪陳煜釗等人，成立傳統詠春聯會，向有志學武者宣揚正宗的詠春，並於日前在佐敦舉行聯歡晚會。席間簡師傅、王正宇、Mark及陳煜釗除了致詞外，更即席表演小念頭和黐手，因為玄門正宗，拳風霍霍，令人看得拍爛手掌！

李小龍反斗星

身為簡師傅師弟的王正宇本身是著名大狀，58年已跟葉問學武，曾跟李小龍做過師兄弟，在他記憶中，李小龍是個非常反斗的人，他說：「李小龍好反斗，行行吓街都可以踢一腳，24小時都諗武術，真係好犀利！」而黃朗更表示李小龍是他學弟，他說：「大家一定未聽過，李小龍原名叫李元鑫，我高佢一級，係佢阿哥嘅同學，佢成家我都識。小龍的確好有武學天分，不過學詠春時間比較短，唔係打得最好。」