盧凱彤期待驚濤駭浪式戀愛

結他創作才女盧凱彤因經常要周圍飛出騷，難免有寂寞時候，大時大節更顯淒涼，她呼籲追求者要行動就要快，因她十分期待一場有「五湖四海」感覺的驚濤駭浪式戀愛！

一支結他走天涯的歌手盧凱彤（Ellen），近日推出孤獨聖誕歌《一個人回家》，單身的她向記者訴苦：「有次一個人做完嘢搭車返去，自己一個人靜思嗰時，突然有一下好寂寞，所以就寫咗《一個人回家》。（點解咁慘情？）依家都冇人追，唔明顯囉！如果要追唔該快啲！（想要點樣嘅人？）我想喺五湖四海入面，談一場驚濤駭浪咁嘅戀愛。（咁誇？要唔要每個地方一個？）我做唔出，雖然咁樣唔使負責任，又唔使住酒店！但其實我都想對方喺自己身邊，唔係咁樣同身處地獄冇分別。」

陪粉絲過節

談及感情，Ellen說：「我要拍拖嘅話就會全情投入，對方一定要唔介意我成日飛來飛去，其實網上傳情我都唔得。（仲有咩條件？）錫我、欣賞我、仲要識唱我所有歌、背晒所有歌詞，我全部演唱會都要睇，睇完唔鍾意都得，但一定要睇咗先，真愛是真！（搵個Fans啦！）唔得，我唔可以要對方冇咗自己，全部迷晒我。（吳彥祖係你Fans呢？）咁又唔同講法！」另外，為了配合她的新歌，Ellen將於下月底在九展舉行主題音樂會，大賣單獨過節Feel，實行與獨身Fans共訴一個人過節的悲哀，慘度聖誕！