Eason浴室吊威吔小E受罪

陳奕迅以全英語對白拍攝的荷里活電影終上映，雖然本身英文水平不俗，但他仍要勤揣摩發音，因怕被指太造作！而最難忘一幕則是在浴室吊威吔，閉氣的同時更感到「戚住戚住」！

陳奕迅（Eason）兩年前參演的荷里活電影《贖命》，要以全英語對白拍攝，對英語水平不俗的他自然「口到拿來」，但原來他亦為此苦加思索，望盡量說得自然：「揣摩咗好耐口音，唔想講得太作狀，但睇番Playback都覺得好扮嘢！」他又大爆不少外國留學的同學講英文很「求其」，會說「Wait me lunch」來表達「等我食飯」！問到是否想藉電影打入荷里活，他笑言沒此打算，因他既不是靠武打，更不是Sell性感。

閉氣谷青筋

提到電影兩年前拍攝，會否怕已「變樣」？Eason即放笑彈，笑言稀薄的「清裝頭」始終如一，可為甄子丹拍古裝戲時做「頭殼替身」！至於最難忘一幕，他透露是在狹窄的浴室中吊威吔，「豪華臀」頂實牆壁，有苦自己知：「吊起咗之後根本冇得借力，下面又戚住喎！仲要好投入咁閉氣谷青筋，好慘o架！」但Eason大讚劇本有深度，犧牲得有價值：「套戲嘅英文名其實係個佛偈，講唔同人面對生死嘅睇法。」

《贖》片導演周隼笑言找他演出全因他英文及演技俱佳，但亦因不靚仔可融入角色，對此Eason笑言只得他覺得自己靚仔已足夠！曾參與《霍元甲》劇本的周隼首次執導，他表示要在香港及美國取景，資金甚難控制，但認為其最大責任是不超支。

化妝：Karry Wong

髮型：Derek Li＠ii Salon