圓圓勁冧發哥：佢真係好好人

汪圓圓雖拍戲不多，但合作對手全是大卡士，包括張栢芝、古天樂與杜汶澤等，還有機會與兒時偶像周潤發合作，在片場獲對方主動聊天，令她受寵若驚。

唔經唔覺入咗電影圈都有四年，以我嘅內向同怕醜性格，好多人都估唔到我會拍戲！不過，我鍾意挑戰自己，有時人哋覺得我做唔到嘅事就偏要做，由呢方面嚟睇，我係幾合適拍戲，依家已經愈來愈習慣面對鏡頭。

雖然四年來拍戲唔多，只係拍過三部，但係完全唔同嘅類型。第一部《導火線》係動作片，第二部《最強囍事》係喜劇，第三部《大鬧天宮》就係3D古裝片，對我嚟講最難忘又挑戰最大嘅一定係《最強囍事》！因為喺眾多片種中，拍笑片係最難，而我唔係喺香港長大，對本土文化唔熟悉，加上廣東話唔好，要搞笑難度就加大！戲中仲有好多有經驗嘅好演員，好似張栢芝、古天樂同杜汶澤等等，身為新人好怕NG連累大家。記得有一場戲因為太緊張，初時講對白已經窒吓窒吓，後來變成腦中一片空白，完全唔記得要講乜，當時所有人望住我，真係尷尬到想就咁跑出去。

勁讚栢芝古仔

其實喺一套戲入面，有機會同咁多好戲之人合作真係好難得。杜汶澤好搞笑，佢無論喺戲裏戲外都帶畀大家歡樂，仲經常會爆肚，就算佢講錯對白都有本事繼續講落去而唔需要NG，喜劇細胞好高；栢芝就好有演戲天分，一埋位即時投入到角色，對所有演員同工作人員都好好，仲經常請食嘢；古天樂係一個好專業嘅演員，工作時好專注，唔需要埋位嘅時候好少同其他人傾偈，會坐喺導演隔籬研究劇情。

不過，講到最開心係有機會同我嘅偶像周潤發（發哥）合作！由細到大都好鍾意佢，細個睇佢做賭神，真係做得好好，有型又搞笑。後來大個咗，聽人講佢好友善，點知真係可以親身感受。喺《大鬧天宮》入面，我有機會近距離接觸發哥，雖然喺片場經常見到佢，但我一直唔敢同佢傾偈。直至同發哥有場對手戲，雖然佢唔知我係甄子丹嘅姨仔，喺佢眼中我只係一個新人，但依然主動走埋嚟同我傾偈，可能佢怕我緊張，所以想同我傾吓等我放鬆心情！佢真係好好人，最難得係身為荷里活巨星嘅佢，對只有一場戲嘅新人都咁照顧，好有大明星風範。

後記：認真．可愛

汪圓圓怕醜內向又不擅表達，雖然入行已一段時間，但她依然不善詞令，受訪前更直接講明：「我未試過做五篇訪問咁多，但我會盡量回答。」過程中，她總是問一句答一句，不懂多找話題，但就算問題再多或事後多次致電補問，她仍然一臉認真，努力回答，正正這份幼嫩又拚命的精神，令人覺得她十分可愛。圓圓繼續努力！支持你！