阿B明年娶范姜

鍾鎮濤（阿B）與女友范姜拍拖多年，並誕下兩個寶貝女，因兩人各有各忙故婚事亦被無限期擱置，不過廿四孝老竇的阿B日前在台灣節目中向女友求婚，揚言明年迎娶對方，氹得范姜笑逐顏開。

近日娛圈喜事重重，多位圈中人齊齊公布喜訊，連阿B亦報喜，透露明年與拍拖多年的女友范姜結婚。阿B日前首次與范姜出席台灣節目《SS小燕之夜》，兩人提到寶貝女鍾懿，阿B說：「佢七歲生日當晚，突然同我講，爸爸我長大喇！唔同你哋瞓，等我長大後同男朋友瞓，嚇咗我一跳，即同佢講唔可以同男朋友瞓，要結婚先，之後佢反問我點解你又同媽咪瞓？」范姜則說：「佢經常投訴我，話佢喺同學屋企，睇到同學啲父母都有結婚相，反而只見我同阿B着住邋遢衫嘅合照。」阿B聽罷即輕拍范姜膊頭求婚：「明年安排，OK？算是求婚喇！」氹得范姜不斷冧笑。

仔女做伴郎伴娘

阿B明天在新加坡舉行溫拿演唱會，他透過電話說：「係，啱喇！今日（即昨日）係感恩節，其實結唔結對我同范姜都冇分別，每件事都要感恩。」他表示舉行婚禮如舉行大型派對。問到主要是向愛女交代？阿B說：「當然啦！到時會搵嘉浚（大仔）同嘉晴（大女）做伴郎同伴娘，兩個細女就做花女。」阿B透露送了一層台灣豪宅給女友：「佢上月生日送咗層台灣樓畀佢。」他以「Super Star」形容鍾懿：「佢26號會同我喺台上合唱《爸爸的話》。」