呂慧儀失驚無神結婚

「長腳蟹」呂慧儀在微博公布婚訊，全城猜測「蟹公」是否落選港男黃文迪！下月13日擺酒的她，婚紗及酒席均有贊助，加上接定Job，看來無礙「錢」途！

向來緋聞多多的06年港姐季軍呂慧儀（Koni），昨日在微博公布：「我要結婚了！」並上載與老公在海邊拖手的「結婚照」，惟相中人背對鏡頭，「蟹公」身份成謎，令與她拍拖7年的08年落選港男黃文迪（Dickson）頓成目標人物，二去年更被指秘密復合兼築愛巢。

下月中擺酒

據知，Koni已向無綫請假一星期，但婚後會密密接Job，加上婚紗及酒席均有贊助，誓做「搶錢新娘」！昨日與陳法拉、郭晉安及阮兆祥等拍攝新劇《東西宮略》的她，直認下月中結婚，更遭祥仔踢爆於13日擺酒。問到是否與Dickson結婚，她支吾以對：「大家上微博睇咪知。（奉子成婚？）唔係，未有咁快整『蟹子沙律』。」並承諾今日在新劇活動中公開另一半身份。

談及求婚過程，Koni笑言已忘記：「好耐之前求，例牌花同戒指。我第一時間通知獎門人（曾志偉），希望佢贊助禮餅，仲打算擺20至30圍。其實我初頭以為影婚紗相玩吓，點知佢嚟真(o架)！」昨晚9時許，她返回電視城，記者再追問「蟹公」身份，她說：「佢唔係圈中人，係靚仔囉！要返去問吓佢點稱呼自己。（叫你黃太？）咁我第時老咗咪變『黃老太』囉！」似默認真命天子是Dickson。

祝早生「蟹子」

至於拍檔法拉接受無綫訪問時自爆早已知情，而郭晉安及陳敏之則透過電話祝福她早生「蟹子」，至於高層樂易玲則指她婚後會如期拍新劇《女警愛作戰》。