家蔚撐「老公」天明：婚期不變
陳嘉桓（Rose）因信任洪天明才跟他們消夜，最後慘遇上「攬錫事件」，天明連日來為此而內疚，怎知昨日有周刊指他與Rose暗撻4個月！天明昨日表示不回應，其「老婆」周家蔚則大派定心丸，稱對「老公」絕對有信心：「直情係亂咁作！我對天明絕對有信心，如果天明喺香港，佢嘅行蹤我瞭如指掌，呢件事冇影響我哋感情！今日天明都有同我一齊搞酒席，邊日結就未定，因為要遷就老爺洪金寶個期！預定擺20圍，明年3月左右舉行，婚期不變！（知天明同Rose熟落？）佢哋合作過兩次，《獎門人》後就係今次嘅電影合作。（勸天明少啲應酬？）酒可以飲，唔好醉就得！」陳浩民昨日開記者會道歉，天明不作回應，家蔚則說：「既然佢公開道歉，都希望外界畀個機會佢改過，唔好再犯就得！」
周家蔚表示與洪天明情不變，大家可以放心。 （資料圖片）