怕醜圓圓黐實詩詩：拍拖都帶埋我

汪圓圓與姊姊汪詩詩向來是Ball場孖公仔，原來由小到大，二人都有影皆雙。詩詩即使拍拖亦帶着她，而她則大膽逃學跟姊姊返大學，認真癡纏！

我有個出名嘅家姐汪詩詩，雖然我同佢年紀相差五年，而且性格南轅北轍，但由細到大都感情好好。

記得小時候佢經常蝦我，點我做嘢，但佢絕對唔會畀其他人蝦我。六歲嗰年，有個小朋友蝦我，家姐即時衝去學校幫我鬧佢。又記得同一年聖誕節，家姐用零用錢買咗本日記送畀我，我知佢儲咗好耐錢，當時我好開心，本日記我一直保存到依家。

為姊姊逃學被鬧

由細開始，家姐去到邊都帶住我，佢好鍾意我陪佢，當時我矮過家姐好多，甚至有人以為我係家姐個女。唔只同朋友聚會，連拍拖佢都會帶埋我，依家諗起家姐以前嘅男朋友，應該好唔鍾意我呢個電燈膽！記得有一年家姐讀大學，佢甚至叫我逃學跟佢返學，當時我仲讀緊中學，家姐瞞住爸爸媽媽，擅自幫我寫紙畀老師請假，帶我去咗佢間大學，後來返到屋企畀爸爸媽媽知道咗，當然好嬲啦！不過，家姐就係咁，諗到就會做。

之後家姐大肚，喺加拿大養胎，姐夫經常喺香港拍戲，長時間唔喺身邊，呢段時間一直係我陪家姐，感覺我做咗佢老公咁。輪到我去加拿大讀珠寶鑑證，一個人喺當地幾個月，當時好想家，家姐突然飛過嚟探我，我真係好驚喜！我哋就係咁一直互相陪住對方，每個重要時刻總有對方喺身邊。

客串老公陪安胎

仲記得我初嚟香港，每次出席公開活動都係姊妹檔上陣，一來家姐鍾意我陪佢，二來我好怕醜，又人生路不熟，所以好驚一個人，後來有次我終於鼓起勇氣一個人去公開活動，係第一次冇家姐喺隔籬，我返到屋企覺得好開心，好有成功感，因為我做到咗，事後諗起都覺得自己好傻！

除咗年齡差距，我同家姐嘅性格亦好唔同，我比較怕醜內向，對唔熟嘅人唔會講太多，亦唔知講咩話題，但家姐就好擅長交際。可能係習慣問題，我細個跟住佢，慣咗做聽眾，家姐負責講，好多事家姐都會出面。家姐總係放屋企人喺第一位，每逢家人發生咩事，佢都會第一個出聲，第一個企出嚟，我為有呢位咁好嘅家姐而自豪！（明日待續）