陳嘉桓師傅誓討公道江湖中人介入

19歲「宅男女神」陳嘉桓日前在內地疑遭前輩陳浩民及馬德鐘借醉狼吻，其師傅兼經理人冼國林勃然大怒，安排她返港並於昨日報警。除圈中人關注事件外，據知更有江湖中人插手！

影壇新貴陳嘉桓（Rose）遇人不淑，日前在橫店拍戲收工後，與香港影視界前輩飯局、唱K再消夜，怎料消夜時，疑遭同行的陳浩民及馬德鐘借醉攬錫，事後她非常困擾，向詠春師傅兼公司老闆冼國林求助，冼師傅得悉愛徒受辱後極為憤怒，立即安排她於前晚漏夜返港，並於昨日舉行記者會，然後到警署報案。

驚到唔識還手

據知，不少人士透過不同渠道調停事件，希望大事化小，當中包括商界、演藝圈中人甚至有江湖背景的人士。記者昨日致電冼師傅求證，他說：「唔同界別嘅人都有，好多都有頭有面，但唔好用到『江湖』呢個字眼咁難聽啦！」對於馬德鐘在微博揚言已獲他與Rose原諒，他不置可否說：「有唔同人士向我提出解決方案，但暫時未向任何一方作出承諾，事件已交由律師處理，我會了解詳情，希望以合情合理合法嘅方式伸張正義！」他又強調：「本住『得饒人處且饒人』嘅宗旨，都可以考慮原諒，大前提係當事人要向陳嘉桓作一個公道嘅交代！」

而冼師傅昨晨接受查小欣《巴巴閉邊個夠我查篤撐》時說：「我睇到相先知咁嚴重，好震驚，今時今日都有呢啲行為出現！」他表示前晚已見過Rose了解事件，並指Rose情緒欠佳：「佢喊咗幾晚，同佢講電話都喊，我有鬧佢『真正帶眼識人應該係佢！』但鬧佢係過分咗，佢係受害者！」問到何以Rose識詠春卻不還手，他說：「一個19歲女仔未經歷過，對住兩個大男人，舉目無親去到橫店呢個地方，未遇過狼，點訓練都冇用，佢驚到手足無措。」他認為整件事有目共睹，演藝界應作出公正評論。

唔識浩民乜水

問到是否認識陳浩民及馬德鐘，冼師傅說：「我唔認識亦唔知邊個係陳浩民，馬德鐘就有同佢食過兩次飯，佢仲好客氣咁叫我做『師傅』。（有冇人打電話求情？）嘻嘻！」對於當日叫陳嘉桓同行的洪天明護花不力，冼國林認為他當時已飲醉，事後亦有SMS道歉。