圓圓激讚甄子丹：絕世好姐夫

汪圓圓出道至今，一直與「甄子丹姨仔」之名掛鈎。雖然背負沉重包袱，但她感激姐夫為她帶來踏足影壇的機會，並指姐夫公私分明，工作上對她一視同仁，但私下則會為她打氣，堪稱絕世好姐夫！

好多人認識汪圓圓，係因為我係甄子丹嘅姨仔，有人會覺得姐夫嚴肅，但對我嚟講，佢係一個絕世好姐夫同最專業演員！

記得16歲嗰年，有日家姐打畀我話要結婚，我以為佢講笑，仲話：「黐線，你都未有拖拍！」原來佢講真！後來，姐夫飛去加拿大見我父母，要求將家姐嫁畀佢，嗰次係我第一次見佢。佢好有禮貌，見家長前幾日特登打電話畀我，同我打招呼，我覺得佢把聲幾好聽，好穩重，畀我第一個印象已經好好。

姐夫好似我哥哥一樣，大家相處好自然，佢外表剛陽，但私下係大細路一名，佢好鍾意甜品，經常講笑，最鍾意攞我嚟開玩笑。姐夫最初同家姐拍拖，當時我係中學生，未有收入，所以佢每次買禮物畀家姐，總會買多份畀我，雖然依家我已經出嚟工作，但姐夫呢個習慣都係冇變。

雖然姐夫好錫我，但工作方面，佢從來冇對我偏私。我知好多人都會覺得我有戲拍係因為甄子丹，以前我真係好介意人哋咁講，因為我從小到大都唔鍾意靠人，好似我讀書都係靠自己努力，唔會要求人幫，如果出嚟成績好，係我應得，成績差我都唔會怨人。

帶挈認識製作人

不過，依家我大個咗，唔會再介意，我承認因為姐夫而令我有機會認識唔同嘅製作人同導演，但有冇去把握呢個機會係靠自己，我參與每一部戲都需要面試，導演認為適合先會畀個角色我做，唔係因為我係甄子丹姨仔就得，我都有付出努力。老實講，喺三套戲中，我嘅對白唔多，如果姐夫開口要求增加我嘅戲份，一定冇問題，但我從來唔會要求姐夫咁做，而姐夫亦唔會咁做，因為佢係個專業演員。

姐夫為人正直，處事好公正。去到片場，我都唔會當佢係我姐夫，我喺其他人面前只會叫佢做甄生，所以片場有啲內地工作人員，唔知我係佢姨仔。

要求嚴格冇被鬧

其中一套電影《大鬧天宮》係由姐夫做武指，我有好多動作場面，姐夫要求好高、好認真，對我更加嚴格，要我做到最好。好多人問我，拍戲時姐夫有冇鬧我，我話冇鬧，佢只係好大聲咁同我講嘢。記得有一場戲要吊威吔，係我第一次，做極都做唔到姐夫嘅要求，當時幾百人等我一個，我對自己好忟，姐夫又好忟，佢就好大聲咁同我講嘢。不過，姐夫一收工就會變番姐夫，佢同我講今日其實做得唔錯，但佢唔可以喺大家面前話我Good Job，因為佢唔想我鬆懈，但佢又怕我唔開心，所以收工即刻安慰同鼓勵我，佢係一個好體貼嘅姐夫，令我好感動。

口述：汪圓圓

筆錄：名人組