志偉代Rose出手：打到佢兩條友瞓低！

弱女陳嘉桓（Rose）遭欺凌，不少網民及圈中人都看不過眼，近期同樣忙於在橫店拍劇的曾志偉「小休」返港，對於陳浩民及馬德鐘的「暴行」，他不禁說：「我返去用詠春拳打到佢兩條友瞓低！」

志偉原先對「狼吻魔爪」事件懵然不知，但昨日出席公開活動時看到照片後便說：「唔應該，太過分，等我返去用詠春拳打到佢兩條友瞓低先。（教訓佢哋？）我下月頭會返上去，到時一定會。」他坦言由於橫店缺乏消遣活動，一眾北上搵銀的藝人經常相約飯敍，加上當時大家以為沒有記者在場，可能「玩大咗」！

懷疑飲假酒出事

談到Rose，志偉大讚對方好乖好純，但對陳浩民及馬德鐘的印象則南轅北轍：「浩民不嬲都玩得癲，但馬德鐘份人唔係咁喎！莫非飲咗假酒？上面有個司機早幾日飲咗假白酒暴斃咗。」雖然志偉經常飲酒「斷片」，但也慨嘆地說：「最慘係連自己做過乜，酒醒之後全部唔記得，可能佢哋依家都後悔到不得了。（你醉咗唔會亂嚟喎！）我身體差嘛！」

同是女仔的鍾嘉欣昨日出席新劇活動時，希望Rose盡快平復情緒！曾返內地拍戲的她說：「我認命嘅，次次有慶功宴翌日我都要開早班，所以冇試過留好耐同玩到癲晒，況且我酒量唔好，亦冇人試過逼我飲。」同場的黃宗澤認為藝人應酬飲酒在所難免，但自己會小心不要飲醉：「如果自己想飲都會留喺屋企飲，有問題都唔會影響到其他人！」

另外，身在海南島的任達華昨日接受電話訪問時，對事件「嬲爆」，他說：「咁衰格？如果真嘅，佢哋要好好反省一下喇！都話飲酒累事o架啦！凡事適可而止，馬騮仔（指陳浩民）嘅金剛棒敵唔過詠春拳嘅，叫師兄（杜宇航）飲番幾杯，同佢較量吓啦！」他更敦促二人要向Rose鄭重公開道歉。