陳庭欣拾級而上

在港姐冠軍陳庭欣（Toby）眼中，將軍澳電視城的紅星四散也許是好事。若諸如佘詩曼等舊的視后不去，新的視后如何會來？Toby知道這是最壞的時候，也是最好的時候。當那些一線花旦撤離電視城後，明年視后會由哪波後浪湧上，天曉得！

想當年，若不是關詠荷這些無綫花旦退下來，阿佘怎會有機會冒着槍林彈雨登上視后之位？的確，刻下電視城風雲色變，暗湧浮現，有力上游的藝人爭相謀求另一條出路。歷史不斷重演，說不定陳庭欣將來會成為阿佘第二，或是Toby第一。

身為港姐冠軍的Toby自信滿滿地說：「我反而覺得呢排好撈咗，因為啲一、二線走晒，就係我剛起步嘅時候。我係一個好新嘅新人，舊年攞咗港姐冠軍後，我用咗好多時間準備做一個好嘅藝人，我喺呢方面好積極，任何機會都會把握。」

機會給有準備的人

Toby是一個頗矛盾的人，雖然以成為第一為目標，卻又謙虛得很，因為她懂得素位而行：「講真，有邊個做呢行唔想紅先？要做就要做到最Top！我決定同公司簽約，就係唔想求其掛住港姐個名虛度光陰。但我知道依家仲有大把嘢要學，紅唔紅仲要講運。當然，就算紅咗都唔可以擺架子，冇巨星係完美嘅，梁朝偉同陳奕迅都不斷增值啦！」

機會一瞬即逝，一旦錯過，恐怕抱憾終生，為了不讓任何機會流失，Toby任何「餐士」也絕不放過：「機會有好多種，我唔可以放過囉！一個好細嘅Job我都會接，係一個好好鍛煉自己嘅機會。依家做司儀比較多，但都希望可以接觸拍戲、唱歌同跳舞等唔同範疇！」

在電視台適者生存，有指只要「碼」住陳志雲、樂易玲和曾勵珍這些大碼頭，他們就會把你點石成金，過好日子。可是，Toby不懂運用人際手腕，或許會成為成名的絆腳石。她說：「TVB咁大，唔係個個高層都識得晒。我最熟嘅係藝員，唔知三大碼頭係邊個，總之我會做好自己，唔會令欣賞我嘅人失望！」所謂讓人「失望」，不外乎被指指點點，打擊自信。

港姐冠軍無限心酸

當日Toby獲選為港姐冠軍，一連串惡語中傷讓她透不過氣，但因為阿Q性格，甚麼難聽說話也「骨」一聲吞下去，她說：「呢個世界總有人關心或唔鍾意你，其實畀人講難聽嘅說話說三道四，真係有啲心酸！我覺得咁樣對當時選我嘅評判唔公平囉，畀人話造假！」

哪個女孩子不喜歡有人錫？即使像阿佘般事業如日中天，也希望有個好歸宿，填滿人生的空白，Toby說：「當然好想拍拖！不過做藝人拍拖真係好難，甚至同圈中定圈外人拍拖都係一個難題。同圈中人拍拖會明白我工作崗位，話題比較多同明白我；同圈外人一齊壓力會冇咁大，但佢一定要識得包容我。我係有追求者，但未係時候囉！」

後記：扭轉敗局

最壞的時候，也是最好的時候。訪問當天，Toby和小記都知道九龍區大塞車，小記家住新界，提早出門也一樣遲到。反觀Toby在最壞的時候轉乘地鐵，電話傳來她的聲音：「我到咗喇！你慢慢啦！」懂得變通，Toby，你贏！