連詩雅出煮意箍「老公」糖妹買平餸發嗲功

近年香港百物騰貴，不少師奶都要出盡法寶抗通脹，今次約埋兩位「80後」歌手糖妹及連詩雅（Shiga），要她們挑戰以50元買三餸一湯，慳家之餘還要識下廚，絕不容易，她們不禁大讚：「世上只有媽媽好！」

今次「慳家大作戰」的主角是年輕歌手糖妹及Shiga參與，兩人需要在灣仔街市各以50元買三餸一湯，並親自入廚落手落腳煮一餐，今次的挑戰要符合「慳得、拗得、煮得、忍得」四大美德，的確有難度！

糖妹以可愛女生造型落街市周圍逛格價，她坦言經常會「蒲街市」，不時跟店主閒聊吹水兼合照：「初初入行搵錢唔多，好多地方應慳則慳，有時買餸都會計過度過，有時候會同班老闆打好關係，博佢哋計平啲畀我嘛！不過今日唔記得帶環保袋，逼住拎膠袋！」

冧掂婆婆減價

糖妹率先買紫菜、節瓜、雞蛋、粉絲及豬肉，更利用嗲功博得老闆娘附送一棵葱，本來只剩下17.5元，但她要再買合共19元的金菇及雞髀菇，惟有再次向店主婆婆發功：「我得番$17.5咋！收平啲得唔得呀？我細路女冇乜錢呀！」最後成功以17.5元交易。

糖妹絕對入得廚房，出得廳堂，隨手拎住把刀手起刀落切瓜、切肉、洗菇、拍蒜頭等，非常厲害：「其實我成日都落廚煮飯，屋企冇人嗰陣都要煮畀細佬食吖嘛！主要都係煮啲家常便飯，少油、少鹽同少糖為主，大家都食得健康啲嘛！」最終她花了一小時炮製葱花炒蛋、蠔油雜菌、節瓜蝦米炒粉絲及紫菜湯，合共三餸一湯。

身穿透視裝的Shiga露長腿殺入街市，見她手上一早準備定貓紙，跟住買餸，但對於食物價錢的認知則麻麻，她買雞蛋時寫明5元4隻，她為慳到盡竟然問老闆娘：「咁我買3隻可唔可以計平啲？」原本用40元買齊餸菜包括10元豬肉，後來她擔心肉味不夠，特別用埋僅餘的10元再買豬肉，豬肉佬見到Shiga說：「嘩！識買餸咁叻女？識唔識煮呀你？」

Shiga對揀選新鮮食品別有一番心得，她說：「雖然我唔叻，但有時都會陪媽咪去買餸，我識揀啲靚番茄、節瓜、菇類咁樣，最緊要睇清楚有冇爛，做個精明嘅消費者嘛！」

Shiga坦言雖然不擅下廚，但對煮食非常好學，為冬瓜去皮、洗蘑菇、切菜等都親自上陣，不但可忍受油煙味，今次更特別邀請到師奶級的經理人從旁指導，她更邊學邊問，還愈煮愈興奮：「我係巨蟹座女仔，雖然我煮食唔叻，但嫁之前，我一定會學好佢，等我可以鎖住老公個胃！」

下廚贏成功感

Shiga最終以不足一小時煮好三餸一湯，包括番茄炒蛋、蠔油生菜、雜菌豆腐及冬瓜瘦肉湯，色、香、味俱全，非常厲害，她說：「原來自己親手煮一餐飯，會咁有成功感，真係好開心，一定要影張相Send畀媽咪睇先！」

慳家列表

糖妹：

節瓜 $3.5

紫菜 $10

粉絲 $2

蒜頭 $2

豬肉 $10

雞蛋 $5/4隻

菇類 $17.5

合共： $50

Shiga：

番茄 $4

雞蛋 $5/4隻

冬瓜 $4

豆腐 $3

菇類 $10

生菜 $4

豬肉 $20

合共： $50