趙哲妤貴氣洗底不屑賺「肉金」

每個人都有屬於自己的回憶錄，中國小姐趙哲妤年紀輕輕，在情場及工作上的經歷已非常豐富！早前為處女寫真集而瞓身拋胸的她，揚言入行後所賺的已「用唔晒」，故決心封胸洗底，改走高貴路線，即使有高價比堅尼騷招手亦未必接！

擁有一把高八度雞仔聲的藝人，在圈中少之又少，現年23歲的中國小姐趙哲妤（Uny）就是其中一人。對於擁有一把獨特聲線，她未有介意，反而感到自豪︰「媽咪知我讀新聞系想做主播，其實唔太贊成，話我把聲唔適合，但我覺得呢樣嘢係我嘅特徵，反而令人認得我。」問到會否擔心影響在娛樂圈的發展，她認為沒有甚麼大不了︰「畀人有話題，而且有男人鍾意我把聲咁嗲，我覺得呢把聲有市場。以前讀書嗰陣，試過上堂學將聲線降低，但啲Friend話我原本把聲好啲。」

只接健康工作

Uny今年憑33C上圍加入寫真戰，但她自言行高貴路線，拒與模混為一談，言語間更暗寸時下模「有Job就接」！她說︰「發展唔係為錢，我有少少揀嘢做，好似有少少唔健康嘅工作，我都唔會接，因為怕影響形象。」她自言道德觀念很重：「我唔想咁性感，出寫真之後都冇乜拋胸啦！咁樣反而多咗品牌騷搵我！雖然屋企人冇反對我性感，但我唔想佢哋擔心。」若將來再「拋胸」亦並非為錢，她說：「大品牌可以考慮吓，可以話我決心洗底，依家就算有高價比堅尼騷都未必接，真係要考慮清楚。」

私房錢用唔晒

個人發展一年多，Uny出席過不少騷及代言活動，她坦言成績不錯，問到是否搵到第一桶金，她笑說︰「冇計過，只可以話用唔晒，仲有錢供好多基金。我儲咗筆錢，但冇7位數咁多，6位數啫！其實我讀書嗰陣已經開始儲！」Uny的私房錢計落不少，但她對「小富婆」三個字非常敏感︰「邊係呀！雖然我讀大學已經揸車，但好多同學都有錢過我，只係我唔使擔心錢銀方面啫！」

活了23年，Uny的戀愛經驗不多，一隻手數得晒，而初戀則是17、18歲的事，她說︰「我拍過4次拖，第一次係18歲前，Puppy Love嚟嘅，嗰時以為拍拖只係拖吓手，放學有人陪，但初戀男友竟然向我求婚，當時好愕然，因為年紀細，唔知咩係結婚，當然拒絕佢啦！之後就分手。」

恐怖！甩拖被偵探Check

談及最難忘的拍拖經歷，不得不提她的英國籍舊愛，她說︰「拍拖兩年，但之後發生咗啲事，佢搵私家偵探查我，我覺得好冇私隱！」問到事件的來龍去脈，她起初不願勾起傷心回憶，其後才透露：「同佢啱啱分手嗰時，有個男仔追我，之後仲一齊去日本旅行。英國嗰個知道咗，求我唔好去，到我去完旅行返香港，一出閘佢就打畀我，話知道我搭邊班機，坐喺邊啲人附近，仲話我知同我一齊去旅行個男仔嘅資料，我覺得佢真係好得人驚！」

至於現時的感情生活，Uny說︰「係有心儀對象，攻勢唔停添！好似送花、送禮物或者首飾，但我唔係貪圖虛榮嘅人，亦唔係拜金一族，我屋企唔算窮，所以唔會收呢啲禮物。」

變態！跟蹤男撩按摩

感情上的不愉快經歷，只是《Uny奇遇記》的一小部分，原來她多次遇到「變態男」！她說︰「以前住小欖，有一晚搭巴士返屋企，當時我着住短褲，車內有個男人不停望過嚟，仲撩我講嘢同拎電話，佢話︰『你隻腳好靚呀！平時係咪鍾意去按摩？不如我約你去做腳底按摩啦！依家去都得o架！』我梗係冇理佢啦！但佢竟然跟埋我落車，當時好驚，即刻打電話叫屋企人嚟接我。」自此以後，她決定買車代步，以免再嚇餐懵！

後記：鋪路承母業

Uny家境不俗，母親做出入口生意，俗語有話「子承父業」，而趙媽媽則想「女承母業」！Uny說︰「我細個想讀理科，但媽咪要我讀商科，因為佢做出入口生意，想我幫佢手。我都有諗過有一日接手佢嘅生意，淡出呢一行，其實我唔會拒絕，只係唔會一下子就退出囉！」