親生仔嘉穎有信心捧獎

向來有指是無綫親生仔女，才有機會在台慶頒獎禮獲獎。無綫「親生仔」鄭嘉穎及「非親生仔」林保怡前晚分別出席活動，前者力撐公司夠公道，亦有信心爭視帝，後者沒被提名視帝卻坦言冇所謂。

日前TVB公布視帝十五強提名名單，有指演技派林保怡因沒有續約而被飛出局，早前保怡暗嘲舊公司世界很小，而榜上有名的鄭嘉穎則如常力撐！前晚二人分別出席活動，嘉穎表示感謝同事支持說：「英雄所見略同。（有冇信心？）如果我對自己冇信心就對唔住支持者，所以我愈來愈有信心，希望頒獎禮會有好成績，但依家諗仲早。」他亦看好黎耀祥及謝天華。對於保怡早前對TVB的「言論」，嘉穎暗寸：「每個遊戲都有規則，你可以選擇參唔參與。」他又不認為外間指續約才有獎拿：「呢兩年祥仔同鄧萃雯都有獎攞，就證明唔係啦！」

睇好法拉稱后

至於視后方面，嘉穎則看好胡杏兒及陳法拉：「杏兒呢幾年好突出，尤其今年，收視好嘅劇集都有佢份，而法拉嘅角色都好受認同。」

另一邊廂，林保怡對於被飛出局只淡然地說：「我又唔係未攞過，亞洲視帝都攞過啦！（同TVB關係如何？）冇TVB就冇我，如果TVB搵我拍劇，係好劇本我都會拍。我係佢哋親生仔好耐喇，換吓環境好正常，張兆輝離開咗十年都返去啦！」

至於視后大熱胡杏兒前晚出席《萬凰之王》慈善晚宴，提到獲鄭嘉穎睇好奪獎，她說︰「有獎已經好開心！」記者昨日再致電她，問到未能憑《怒火街頭》入圍爭視后，杏兒說︰「觀眾都覺得唔抵！但自己兩套劇都鍾意！」

杏兒網上拉票

問到男友黃宗澤（Bosco）在她生日時與女伴食飯，杏兒說︰「係咩？冇睇報道，我要返工嘛！唔好講呢啲嘢喇！」（佢睇好你奪視后？）我依家好努力喺網上宣傳，希望多啲人投票。（幫埋Bosco拉票？）冇呀！拉自己票，顧掂自己先。」此外，同場的陳錦鴻則表示滿意《萬》劇收視，笑言能入圍視帝五強已感滿足。