諸葛真心：對住佢放電

諸葛紫岐生長在優越家庭，真的自小不識窮滋味，吃好、穿好、無憂米，因金句「可以冇男朋友，但係唔可以冇工人。」遭誤解而被視為「公主」，對她來說，可謂當頭棒喝，慎言是何等重要。

媽咪一直都唔想我咁早工作，我終於知道點解咁保護我，因為我唔識表達或者修飾說話，所以發生好多撞板事情。好似話我有句金句「雙層巴士好易翻」，其實我唔係話自己咁巴閉唔坐巴士，亦都冇話公共交通工具危險，只係以物理學同數學去計，香港啲路咁窄，巴士又係雙層，相對嚟講喺轉彎時係比較容易翻車。我當然有搭過巴士啦！平時因為我有車，所以好少搭巴士，唔通有車唔坐，走去搭巴士，咁架車要嚟做咩？

男友唔可以亂揀

其後有個報道懶係好笑，話我勁過玄學大師，因為我講完後，真係有架巴士出意外翻咗！但係我唔覺得好笑，睇完好心噏，意外冇人想有，有傷亡更加令人唔開心，點解要將兩件事擺埋一齊講？同情心去咗邊？點解要喺意外傷者傷口灑鹽？

另一句所謂金句「可以冇男朋友，但係唔可以冇工人。」我九歲移民加拿大，父母因為做生意要成日飛，加上我係獨女，所以咁多年都係咁，家傭照顧我。家傭盡心盡力照顧我日常起居生活，但係家傭同男朋友唔可以比較，家傭係你畀錢，任何一個人都可以返工，佢唔需要付出感情，只要做好份工就可以。但係男朋友唔係畀錢就有，唔可以亂揀一個就算，係要真心愛佢、對住佢放電嘛！哈！

就係因為從小有家傭照顧，我又多衫多雜物，個人又「大頭蝦」，所以我自認自理能力唔高。但依家大個咗，比以前好好多，好似同男朋友去旅行，間酒店有廚房，我會買食材親自下廚，煲湯、整意粉。

（明日待續）