許冠英一個人走到終點

許冠英前晚猝逝的噩耗，圈中人無不悲慟，阿英心臟有事卻沒有裝平安鐘，二哥許冠武爆門搵人已陰陽相隔，享年65歲的阿英黯然走過光影一生。

突如其來的許冠英逝世消息，令圈中人無不惋惜，阿英早在年多前已發現心臟出現問題，要長期依賴心臟起搏器維持生命，可惜最終也經不起病魔來襲，前晚在九龍塘寓所逝世，享年65歲。其遺體已移奉富山公眾殮房，大哥許冠文和弟弟許冠傑（Sam）已得知噩耗。

喪禮安排未定

昨晨11時，二哥許冠武、兩名姪兒許懷欣和許懷谷先後現身富山殮房辦理認屍手續。眾人雖然神情肅穆，卻沒有過於哀傷，顯然已接受阿英離世的事實。一小時後，冠武跟懷欣兩兄弟分車離開，問到喪禮安排，懷欣說：「安排都未決定，而爹哋（Sam）亦喺香港！」

問到阿英本來有甚麼工作安排？懷欣說：「佢好鍾意做爹哋嘅演唱會嘉賓，我真係好懷念佢成日都咁開心！」而冠武亦強調仍未定好弟弟的身後事，問醫生是否證實心臟病致命？他說：「九成九係！」並表示阿英的日籍女友已得知噩耗。

爆門入屋救人

記者在冠武辦理完認屍手續後致電給他，問阿英遺容是否安詳？他說：「OK，都係瞓覺咁！」及後他詳述事發經過，他憶述前晚8時已收到阿英助手電話，得知阿英約了助手睇腰骨，但整天卻失去聯絡，即使助手上門按鐘依然無人應門，冠武說：「原本已搵開鎖師傅爆門入屋，卻遭保安阻撓，佢助手咪打畀我囉！去到就同看更講我係佢哥哥，一定要開門，性命攸關！」

誰不知一開門，冠武的心已涼了一截：「我見佢道門反鎖，落晒防盜鏈，心知不妙，知佢一定喺屋企。走到入房，見阿英面向枕頭，半個人趴咗喺度，好似好辛苦咁，估計佢想落床攞藥食。當時我見佢全身都硬晒，好似殭屍咁，探佢冇脈搏冇呼吸，估計佢應該走咗。佢之前一晚仲有聯絡助手，話返屋企瞓，我諗佢應該走咗18小時。」

未裝平安鐘

冠武透露，阿英年多前曾暈倒及呼吸不順，後來發現心臟瓣出現問題，要依賴心臟起搏器維生及食藥。因為阿英獨居，家人曾叫他裝平安鐘保平安，可惜最後不了了之。他表示Sam是在警方證實阿英死亡後才得知消息，縱使傷心卻沒有哭，只交帶要即時處理其身後事，而身在廣州的大哥許冠文亦已收到通知。

問他四兄弟感情如何？冠武說：「Sam同阿英感情最好，佢哋一齊做騷，密切好多。我最後一次見佢係今年8月Sam嘅廣州演唱會，嗰時都冇乜事。唉！其實呢件事都好突然，唯一安心係佢冇受病魔折磨，無痛地走。」