諸葛爆追求史：係佢留意我先

諸葛紫岐曾與恒基大公子李家傑傳緋聞，但隨着與中星集團主席薛嘉麟的戀情曝光而結束。拍拖接近三年，這位管理市值逾廿億家族生意的集團主席在諸葛眼中既孝順又實幹，而且浪漫橋段層出不窮。

李家傑係我一直尊重嘅朋友，佢喺我眼中係溫文有禮、愛研究佛學嘅大哥哥，只係傳媒敏感亂寫啫！我同「主席」（薛嘉麟）拍拖接近三年，當年我哋喺中聯辦同菁英會合辦嘅派對而認識，邊個留意對方先？一定係佢留意我先啦！哈哈！當晚認識好多新朋友，互相交換電話，「主席」係其中一個，之後大家都有Send短訊問好同約食飯。我平時都會同好多男女朋友食飯，飯每日都要食o架啦！

一切由食開始

當時，「主席」間中放工會打嚟問我喺邊，如果知我一個女仔喺街等朋友，佢就話過嚟陪我，直至朋友到咗佢就走。後來，我話屋企嘅工人煮飯好叻，邀請佢嚟試手勢，食食吓佢話：「真係煮得好食喎！如果日日食都唔錯！」我當時仲答佢話：「哦！你得閒就過嚟食囉！」其實我好男仔頭又慢熱，唔會自作多情，所以Feel唔到佢真正嘅意思。直至有次我同個男仔好平常咁食餐飯，「主席」終於話其實唔鍾意我同其他男仔食飯，我當時仲問點解，佢先至話：「因為我鍾意你！」我停一停，諗一諗之前嘅嘢，都Make Sense喎！況且同佢相處好開心，就試吓拍拖啦！

「主席」係好忙，就算冇時間、唔浪漫都唔緊要，今日佢做嘅都係為我哋嘅未來鋪路。講開浪漫，記得有次食飯問我想睇咩戲，我原本話A嘅，佢話一早估到我會想睇仲買咗飛，但當我轉話想睇B，佢又話有飛！原來佢一早買晒咁多部！佢知我喜歡麵包超人，見我辛苦又會買嚟氹我，使唔使佢着埋麵包超人內褲？哈哈，條褲有冇咁大Size？佢身形唔同咗，係水腫唔係肥呀!（明日待續）