Cammi咀陳冠希遭家長鬧爆

陳冠希與16歲o靚模學生謝芷蕙（Cammi）的啜爆慾照流出後，全城鬧爆！不少家長受拖累大感不滿，向Cammi作出大控訴，搞到她昨日要低調返學；反觀「慾照主角」陳冠希則置身事外，還高調玩微博晒相！

陳冠希（Edison）與Cammi爆出「EC戀」，多張啜爆慾照相繼流出，哄動全城！Cammi因壓力爆煲，情緒崩潰，上周四及周五兩天不返學，留在家中避世！慾照事件除令Cammi成為新聞人物外，同時令同學及家長大受影響，有家長作出四大控訴：指她發表「處女論」、未成年便影啜爆親密照、為家長及同學帶來不便、家長不滿她上周五曠課卻接受電視台訪問。

否認爆性能力

Cammi表示昨日如常返學放學，但極為低調，她接受本報記者電話訪問時說：「我有返學，Lunch時社工搵我傾偈。（傾乜？）佢叫我Take Care，唔好唔開心，同埋叫我畀心機讀書。（你唔開心？）我好咗好多。」對於被家長投訴，她表示不知情：「我唔知呀！（學校出通告畀同學？）我冇聽過！今（昨）日照平時如常返學，嚟緊會繼續返學，最想做好自己。（父母有冇嬲？）咁又冇，佢哋最緊要我開心。」有指她曾大爆Edison性能力？Cammi只說：「哎吔！唔講呢啲嘢，總之我冇講過，其他嘢唔回應。（搵Edison？）我唔講，唔回應。」問到會否擔心公司力捧其他o靚模？她說：「唔諗咁多，之前10幾個模特兒一齊影，當日我仲發燒，仲影到暈咗，去咗睇醫生。」

老師質疑真假

此外，Cammi就讀的中學方面亦作出相應對策，據悉校方早前派了通告，叫學生不用理會記者採訪，昨日有老師說：「佢冇同我哋交代會唔會返學。」另一位老師則說：「佢說話有幾多係真、幾多係假？大家都知啦！」而Cammi的中學校長，昨日回覆本報記者時只表示，校方注重德育教育，重視學生道德判斷，學校強調不會針對個別人士或事件而作出評論，又指會盡力教好所有學生，希望學生能專注學業，進修語文能力！當問到對Edison要Cammi穿校服影相一事有何看法？如何跟進Cammi個案？有沒有心理輔導及家長對事件的反應？校長均不作回應。此外，由於連日來有傳媒在Cammi就讀中學守候，據知不少學生被攝入鏡後，有學生家長向學校反映。

另外，昨午約五時，記者在Cammi秀茂坪寓所樓下遇上謝父買餸回家，問到Cammi有否返學及是否在家？他沒有回應，只說：「你哋自己問番佢啦！」相對Cammi低調返學，「慾照主角」Edison繼續高調玩微博，繼早前上載貓相及自拍照外，昨日又放上新衫相，似乎對事件置身事外！