Baby無辜變歡樂小姐

名模Angelababy近年多次被盜用肖像宣傳產品，近日本港一間娛樂場所竟以Baby的肖像作海報主角，令Baby變成「歡樂小姐」！事後該娛樂場所發現擺烏龍，立刻向Baby致歉及即時收回海報。

人氣高企的Baby肖像曾多次被盜用，當中包括睫毛液及瘦身產品等等，最近本報發現本港一間娛樂場所「聲X廊」在大街張貼了不少印有Baby模樣的海報，令人側目的是該海報的用字大膽露骨，令人想入非非：「歡樂時光 美女o靚模 香港製造 全日街鐘一律HK $600」，Baby無辜成為「歡樂小姐」，不少途人也不禁駐足觀看。本報翻查資料，發現該相片是Baby所屬的日本經理人公司avex推出的一張雜錦碟封面照。

版權日本擁有

本報致電Baby經理人Kim詢問，Kim表示兩日前已有人告知此事：「海報嗰張相係Baby日本CD嘅封面相，版權屬於日本，日本經理人同我都覺得好猖獗，所以一定會追究，依家已經做緊嘢！」他續說Baby正身在北京拍戲，他本人也剛抵北京，故稍後跟Baby會面時會把事件相告。

被誤當韓國人

而「聲X廊」負責人經了解後，向本報表示該海報是交由一間獨立廣告公司製作，他說：「事前我冇過目，自己本身唔喺香港，所以交畀夥計搞。據了解夥計收到張海報後，曾經質疑相中人好似一個香港明星，但廣告公司話係韓國人，所以夥計不以為然照用。依家知道係Baby後，首先要向佢致歉，亦即時叫人回收同埋撕走所有海報，並已交畀律師協調同處理。」