簽婚前協議不如唔好結 諸葛紫岐：咁即係侮辱愛情

「嫁個有錢人」是一眾女士的夢想，但名模諸葛紫岐從未想過要踏入豪門。明年三月將擺百席豪門婚宴的諸葛，最快明年為薛家開枝散葉，滿足日夜催生BB的男友願望。不過，要她簽婚前協議卻是萬萬不能。背負諸葛亮後人之名的她，將一連五日分享其人生、愛情觀。

初時識主席（薛嘉麟的暱稱），根本唔知佢咩背景，佢只係話做Neway卡拉OK，又問我唱唔唱K，佢仲話：「CEO都係我嘅！」我當時根本冇聽過，點知有幾多間分店？

我從來冇「嫁個有錢人」呢個概念，我屋企環境都好好，反而唔會刻意去搵個有錢嘅另一半，最緊要係大家一齊係咪開心，因為老公係一世！以前我都有家境比較差嘅男友，記得有次我同家人去旅行，我仲留低錢畀佢傍身。我承認錢呢方面會對人疏爽，朋友問我借，我會好爽快，記得以前有個同學要送外賣幫補，我都唔會自己出面，或者叫多啲人幫襯、畀多啲貼士佢。

嗌完交糖黐豆

拍唔夠三年拖就結婚，我認為緣分到，大家一齊開心舒服，可以一生一世，拍幾多年拖重要咩？我欣賞主席嘅大方、孝順同有禮貌，嗰份上進心同實幹係好難得！我喺佢眼中，係個開心百厭嘅小朋友，同我相處唔需要用腦，一齊睇碟已經好開心。佢知我鍾意食甜品，見我唔開心，帶我去食我又即刻開心番！

情侶裝？哈哈！我哋好多o架！身邊好多朋友都羨慕我有個好男友，我會話：「咁我好嘛！」哈哈！拍拖咁耐，我哋冇冷戰，就算嗌完交，唔夠半個鐘佢會氹番我，佢好有紳士風度、讓女仔，我又係會話：「算啦！大家都有唔啱，冇事嘞！」咪又係糖黐豆！

嫁入豪門做闊太好大壓力？真係冇！如果拍拖結婚有壓力，就千祈唔好結，我係開心人，都想同我結婚嘅人係開心。婚前協議？哈哈！如果有呢類協議，根本就唔好結婚，咁樣即係唔係愛啦！咁就唔好結啦！侮辱咗愛情，咁樣大家好辛苦！如果肯簽，根本唔係真愛！

生夠三個仔女

結婚之後，我諗我要放多啲時間打理好頭家，老公咁辛苦，我要做好本分支持佢，所以都要犧牲，可能會減產，但係唔會完全唔工作。主席無數次叫我唔好做嘢，成日都話想生小朋友，我都好想快，但我想大家身體更加好先至生，生出嚟嘅BB會健康啲，可能好快，下年或者兩、三年後生，但係一定唔會奉子成婚，呢啲常識好清楚，一定唔會發生！主席媽咪都好好，從來冇畀過生仔或生女嘅壓力我，我最想生三個，媽咪話架車有三個位，可以前後都坐晒，佢都好恨抱孫o架！哈！

依家個個都話驚小三，我認為有緣分先可以一齊，係你就係你，如果要我成日Check電話或者行蹤，大家都辛苦。如果你個男人冇問題，係冇小三存在。主席連瞓覺時間都冇，邊有時間應酬人，我又日日對住佢，佢對電話、電腦同我最耐，工作就係佢小三，哈！好似有雜誌影佢去遊船河，佢個女仔朋友搭佢膊頭就話有新歡，我睇完笑番佢被人抽水！

Profile

姓　名　：諸葛紫岐（Marie）

年　齡　：28歲

身　高　：5呎7吋

三　圍　：33、25、34

入行經過：

08年拍飲品廣告為人熟悉，首次行騷已跟名模樂基兒拍住上，其後被揭是諸葛亮第63代後人，年前進軍日本市場，曾行TGC騷及出唱片。