「祖臣」爭獎口水戰駁火

歌神陳奕迅（Eason）連環出招玩謝天后容祖兒！二人昨日出席新城勁爆記者會時，Eason領獎時無厘頭叫祖兒上台陪襯，祖兒無奈還擊：「你好無謂囉！」「祖臣」爭獎前先來舌戰，好睇過頒獎禮喎！

又到年底，樂壇頒獎禮陸續殺到埋身，《新城勁爆頒獎禮》將於下月28日舉行，昨日在荃灣舉行記者會，吸引Eason、祖兒、Twins、方大同、官恩娜及吳雨霏（Kary）等出席。Eason與祖兒向來是樂壇頒獎禮大贏家，關係亦友亦敵，最弔詭是Eason總喜歡拿祖兒開玩笑，「祖臣」唇槍舌劍，昨日Eason更擺到明玩祖兒，引發笑彈！

基仔離奇不入12強

大會昨日公布播放指數最愛12強及率先頒發3獎，Eason先拔頭籌奪「新城勁爆播放指數大獎（歌手）」，當他領獎分享感受時，竟無厘頭叫祖兒上台陪襯，令她尷尬萬分，Eason更對住祖兒隨口噏：「你加油啦！有一日你一定得！」不忿被玩的祖兒即還擊：「好煩呀你！呢啲動作好無謂囉！」誰知Eason竟把獎遞給祖兒，祖兒只好轉送給工作人員，Eason還得戚地說：「我大把！」一輪大龍鳳後，祖兒領取年度專輯大獎，她即衝着Eason高呼：「事實勝於雄辯，我做到！」不甘被寸的Eason即衝上台搶咪說：「使唔使咁呀！」

事後接受訪問時，Eason否認與祖兒舌戰：「我哋不嬲都係咁溝通！（叫祖兒加油先有獎？）每個人都得，我同佢熟先咁講！如果係霆鋒，我都會咁講！我同祖兒都有以禮相待嘅時候，就係記者不在場嘅時候！」他大爆最新「玩具」是Kary：「我都有玩霏姐o架！（鍾意玩人？）如果離譜佢哋會講，之前都有前輩透過記者同我講o架！」但他希望不要再黐埋基仔來講：「同基仔糾纏多年，大家都悶啦！」不過去年勇奪佳績的基仔，竟不敵關心妍、農夫及官恩娜等後輩，未能躋身播放指數12強！

Kary突然躋身一線

雖然被Eason寸爆，難得祖兒笑說：「呢一行冇Eason同我玩會好悶，佢特別撩起我把火，冇分寸！（佢話同你以禮相待？）幾時呀？佢係資深演藝工作者，畀大家好交差！鬥氣都要有力，我哋做到隻茄都冇力鬥啦！可能Eason老咗冇正面攻擊我，佢喺電台讚我都唔慣，可能佢步入中年從良！」此外，祖兒出席另一活動時強調，因趕戲才缺席《叱咤》記者會。另一邊廂，今年轉投環球的Kary，憑《我本人》奪歌曲獎兼躋身一線，她說：「我有努力，有回報嘅！」